ജെ.എൻ.യു വിദ്യാർഥി യൂനിയൻ തെരഞ്ഞെടുപ്പിൽ ഐസ-ഡി.എസ്.എഫ് സഖ്യത്തിന് ജയം; എസ്.എഫ്.ഐ -എ.ഐ.എസ്.എഫ് സഖ്യത്തിന് തിരിച്ചടി

ന്യൂഡൽഹി: ജവഹർ ലാൽ നെഹ്‌റു സർവകലാശാല വിദ്യാർത്ഥി യൂനിയൻ തെരഞ്ഞെടുപ്പിൽ ഐസ നയിച്ച ഇടത് സഖ്യത്തിന് ജയം. ജെ.എൻ.എസ്.യു പ്രസിഡന്റ് ആയി ഐസ -ഡി.എസ്.എഫ് സഖ്യത്തിലെ നിതീഷ് കുമാർ തെരഞ്ഞെടുക്കപ്പെട്ടു. ഇതേ സഖ്യത്തിന്റെ ഭാഗമായിരുന്ന മുൻതഹ ഫാത്തിമയാണ് ജനറൽ സെക്രട്ടറി. വൈസ് പ്രസിഡന്റ് ആയി ഇടത് സഖ്യത്തിലെ മനീഷ വിജയം കണ്ടു. ജോയന്റ് സെക്രട്ടറി സീറ്റ് എ.ബി.വി.പിയിലെ വൈഭവ് മീന നേടി. 

ഇടത് -മതേതര വിദ്യാർത്ഥി സംഘടനകൾ ചേരിതിരിഞ്ഞു വാശിയോടെ മത്സരിച്ച തെരഞ്ഞെടുപ്പിൽ എസ്.എഫ്.ഐ -എ.ഐ.എസ്. എഫുമായും എൻ.എസ്.യു ഐ ഫ്രറ്റേണിറ്റിയുമായും സഖ്യത്തിലായിരുന്നു. എസ്.എഫ്.ഐ -എ.ഐ.എസ്.എഫ് സഖ്യത്തിന് പ്രതീക്ഷിച്ച മുന്നേറ്റമുണ്ടാക്കാനായില്ല. 

42 കൗൺസിലർ പോസ്റ്റുകളിൽ 23 എണ്ണം എ.ബി.വി.പി പിടിച്ചു. ഇടതുപക്ഷത്തിന്റെ ശക്തികേന്ദ്രമായ സ്കൂൾ ഓഫ് സോഷ്യൽ സയൻസിലും സ്കൂൾ ഓഫ് ഇന്റർനാഷണൽ സ്റ്റഡീസിലും എ.ബി.വി.പി രണ്ട് സീറ്റുകൾ നേടി. എൻ.എസ്.യു.ഐ-ഫ്രറ്റേണിറ്റി സഖ്യം രണ്ട് സീറ്റ് നേടി.