വീണ്ടും വരുമോ ഏഷ്യകപ്പ്​

ഏതെങ്കിലും രാജ്യത്തെ കായിക മത്സരങ്ങൾ മാറ്റിവെക്കുന്നതിനെ കുറിച്ച്​ ആലോചിക്കുമ്പോൾ ആദ്യം തെളിഞ്ഞുവരുക യു.എ.ഇയുടെ മുഖമായിരിക്കും. പ്രത്യേകിച്ച്​ യു.എ.ഇയുടെ അയൽ രാജ്യങ്ങളുടെ. ലോകകപ്പ്​ ​​ക്രിക്കറ്റും ഐ.പി.എല്ലും ഏഷ്യാകപ്പും ഏഷ്യൻ ബോക്സിങ്ങുമെല്ലാം ഇങ്ങനെയാണ്​ യു.എ.ഇയിലേക്ക്​ പറിച്ചുനട്ടത്​.

ഈ നാട്​ നൽകുന്ന സൗകര്യങ്ങളും ആധുനിക സംവിധാനവും യാത്രാ സൗകര്യവുമെല്ലാമാണ്​ ലോകമാമാങ്കങ്ങളെ പോലും ഇവിടേക്ക്​ വീണ്ടും മാടിവിളിക്കുന്നത്​. ഇപ്പോഴിതാ, ഏഷ്യൻ വമ്പൻമാരുടെ നേർപോരായ ഏഷ്യ കപ്പ്​ ​ക്രിക്കറ്റ്​ വീണ്ടും യു.എ.ഇയിൽ എത്താൻ സാധ്യത തെളിയുന്നു. ഈ വർഷം അവസാനം പാകിസ്താനിൽ നടക്കേണ്ട ടൂർ​ണമെന്‍റിൽ ഇന്ത്യ കളിക്കില്ലെന്ന്​ വ്യക്​തമാക്കിയതോടെയാണ്​ യു.എ.ഇ വീണ്ടും ചർച്ചയിലെത്തുന്നത്​. ഇന്ത്യയുടെ മാത്രം മത്സരങ്ങൾ പാകിസ്താന്​ പുറത്ത്​ നടത്താനും ​ആലോചന നടത്തുന്നുണ്ട്​. എന്നാൽ, യു.എ.ഇക്ക്​ പുറമെ ഇംഗ്ലണ്ട്​, ഒമാൻ, ശ്രീലങ്ക എന്നീ രാജ്യങ്ങളും പരിഗണനയിലു​ണ്ട്​.

അതേസമയം, ഇന്ത്യ പിൻമാറിയാൽ ഇന്ത്യയിൽ നടക്കുന്ന ലോകകപ്പിൽ നിന്ന്​ പിൻമാറുമെന്ന്​ പാകിസ്താനും ഭീഷണി മുഴക്കിയിട്ടുണ്ട്​. തുടർചർച്ചകളുടെ അടിസ്ഥാനത്തിലായിരിക്കും വേദി തീരുമാനിക്കുക. ഇത്തവണ ഏഷ്യകപ്പിൽ ഏകദിന മത്സരങ്ങളായിരിക്കും നടക്കുക. ശ്രീലങ്ക, ബംഗ്ലാദേശ്​, അഫ്​ഗാനിസ്താൻ എന്നിവയാണ്​ മറ്റ്​ ടീമുകൾ. യോഗ്യത കടമ്പ പിന്നിട്ട്​ വരുന്ന ടീമുകളും ഇവർക്കൊപ്പം ചേരും. 13 ദിവസങ്ങളിലായി 13 മത്സരങ്ങളുണ്ടാവും. ഏഷ്യകപ്പിന്‍റെ തുടക്കം ഷാർജയിലായിരുന്നെങ്കിലും പിന്നീട്​ പലരാജ്യങ്ങളായിരുന്നു ആതിഥ്യം വഹിച്ചിരുന്നത്​. കഴിഞ്ഞ ഏഷ്യകപ്പ്​ ശ്രീലങ്കയിലായിരുന്നു നടക്കേണ്ടിയിരുന്നത്​.

എന്നാൽ, ആഭ്യന്തര പ്രശ്നങ്ങളെ തുടർന്ന്​ യു.എ.ഇയിലേക്ക്​ മാറ്റി. കോവിഡിനെ തുടർന്ന്​ ട്വന്‍റി-20 ലോകകപ്പിനും യു.എ.ഇയാണ്​ വേദിയൊരുക്കിയത്​. ഇന്ത്യൻ പ്രീമിയർ ലീഗിന്‍റെ രണ്ട്​ സീസണുകൾ നടത്താനുള്ള ഭാഗ്യവും അടുത്തിടെ യു.എ.ഇക്ക്​ ലഭിച്ചു. വീണ്ടുമൊരു ക്രിക്കറ്റ്​ മാമാങ്കത്തെ വരവേൽക്കാൻ സദാസന്നദ്ധമായി നിൽക്കുകയാണ്​ ദുബൈയും ഷാർജയും അബൂദബിയും.