യു.എ.ഇ സ്കൂളുകളിൽ വീണ്ടും നേരിട്ട്​ ക്ലാസ്​

ദുബൈ: കോവിഡ്​ ആശങ്കയുടെ പശ്ചാത്തലത്തിൽ ഓൺലൈനിലാക്കിയ സ്കൂൾ പഠനം വീണ്ടും നേരിട്ട്​ ക്ലാസുകളിലേക്ക്​ മാറുന്നു. ശെശത്യകാല അവധിക്ക്​ ശേഷം ജനുവരി മൂന്നിന്​ ആരംഭിക്കേണ്ട ക്ലാസുകൾ മൂന്നാഴ്ചയായി അബൂദബി, അജ്​മാൻ, ഫുജൈറ, ഉമ്മുൽ ഖുവൈൻ എന്നിവിടങ്ങളിൽ ഓൺലൈനിലാണ്​ നടക്കുന്നത്​.

ഇത്​ അടുത്ത ആഴ്ച മുതൽ നേരിട്ട്​ ക്ലാസുകളിലേക്ക്​ മടങ്ങുമെന്ന്​ സർക്കാർ വൃത്തങ്ങൾ അറിയിച്ചു. സർവകലാശാലകളിലും കോളജുകളിലും മറ്റു പരിശീലന സ്ഥാപനങ്ങളിലും ഈ നിർദേശം ബാധകമായിരിക്കുമെന്ന്​ അബൂദബി അടിയന്തര ദുരന്ത നിവാരണ സമിതി പ്രസ്താവനയിൽ വ്യക്തമാക്കി. ജനുവരി 24 മുതൽ കിന്‍റർഗാൻഡൻ, ഒന്നുമുതൽ അഞ്ചുവരെ ഗ്രേഡ്​, 12ാം ഗ്രേഡ്​ എന്നീ വിദ്യാർഥികൾക്ക്​ പ്രവേശനം നൽകും.

ഉന്നതവിദ്യഭ്യാസ സ്ഥാപനങ്ങൾക്കും ദേശീയ-അന്തർദേശീയ പരീക്ഷകൾക്ക്​ തയാറെടുക്കുന്ന വിദ്യാർഥികൾ എന്നിവർക്കും 24 മുതൽ നേരിട്ട്​ ക്ലാസിൽ വരാം. ആറു മുതൽ 11 വരെ ഗ്രേഡുകളിലെ വിദ്യാർഥികൾ ഈ സമയത്ത്​ ഓൺലൈൻ പഠനം തുടരണം. ജനുവരി 31 തിങ്കളാഴ്ച മുതൽ മറ്റു ക്ലാസുകളിലെ വിദ്യാർഥികൾക്കും നേരിട്ട്​ ഹാജരാകാമെന്നും അറിയിപ്പിൽ പറയുന്നു. എല്ലാ വിദ്യാർഥികളും ക്ലാസിലെത്തുന്ന ആദ്യ ദിവസം 96 മണിക്കൂറിനിടയിലെ പി.സി.ആർ നെഗറ്റീവ്​ സർട്ടിഫിക്കറ്റ്​ ഹാജരാക്കണമെന്ന്​ നിർദേശമുണ്ട്​.