ബി.ആർ. ഷെട്ടിക്കെതിരെ ​എൻ.എം.സി കേസ്

​ദുബൈ: യു.എ.ഇയിലെ പ്രധാന ആരോഗ്യ സേവനദാതാക്കളായ എൻ.എം.സി കമ്പനി സ്ഥാപകനും ഇന്ത്യക്കാരനുമായ ബി.ആർ. ഷെട്ടിക്കെതിരെ 400 കോടി ഡോളറിന്‍റെ വഞ്ചനക്കുറ്റം ആരോപിച്ച്​ കേസ്​ ഫയൽ ചെയ്തു. കമ്പനി അഡ്​മിനിസ്​ട്രേട്ടറെ ഉദ്ദരിച്ച്​ യു.എ.ഇ മാധ്യമമാണിത്​ റിപ്പോർട്ട്​ ചെയ്​തത്​. അബൂദബിയിലും ബ്രിട്ടനിലും ഫയൽ ചെയ്ത കേസിൽ ഷെട്ടിക്ക്​ പുറമെ, കമ്പനി മുൻ ചീഫ്​ എക്​സിക്യൂട്ടിവ്​ പ്രശാന്ത്​ മങ്ങാട്ട്​, ബാങ്ക്​ ഓഫ്​ ബറോഡ എന്നിവർക്കുമെതിരെയാണ്​ വഞ്ചനക്കുറ്റം ആരോപിക്കുന്നത്.

എൻ.എം.സിയുടെ നിലവിലെ അഡ്​മിനിസ്​ട്രേഷനാണ്​ കേസ്​ ഫയൽ ചെയ്തിരിക്കുന്നത്​. കമ്പനിയുടെ 400 കോടി ഡോളറിലധികം വെളിപ്പെടുത്താത്ത കടം കണ്ടെത്തിയതിനെ തുടർന്ന്​ ഏറ്റെടുത്തശേഷമുണ്ടായ സുപ്രധാന നാഴികക്കല്ലാണ്​ കേസ്​ ഫയൽ ചെയ്​തതെന്ന്​ എൻ.എം.സി ജോയന്‍റ്​ അഡ്​മിനിട്രേറ്ററും മാനേജിങ്​ ഡയറക്ടറുമായ റിച്ചാഡ്​ ഫ്ലെമിങ്​ പറഞ്ഞു. കോടതിനടപടികൾ നടക്കുന്നതിനാൽ കൂടുതൽ വിവരങ്ങൾ പുറത്തുവിടാനാകില്ലെന്നും അദ്ദേഹം കൂട്ടിച്ചേർത്തു. വിഷയത്തിൽ ഷെട്ടിയുടെയും പ്രശാന്ത്​ മങ്ങാട്ടിന്‍റെയും ബാങ്ക്​ ഓഫ്​ ബറോഡയുടെയും പ്രതികരണം പുറത്തുവന്നിട്ടില്ല.

1975ൽ ഷെട്ടി സ്ഥാപിച്ച എൻ.എം.സി ഹെൽത്ത്​കെയർ ഒരു ക്ലിനിക്ക്​ എന്നതിൽനിന്ന്​ വളർന്ന്​ യു.എ.ഇയിലെ ഏറ്റവും പ്രമുഖ ആരോഗ്യസേവന ദാതാക്കളായി വളർന്നിരുന്നു. ലണ്ടൻ സ്​റ്റോക്ക്​ എക്സ്​ചേഞ്ചിൽ ലിസ്റ്റ്​ ചെയ്ത കമ്പനിയുടെ 2018ലെ മൂല്യം 1050 കോടി ഡോളറിലെത്തിയിരുന്നു.

എന്നാൽ, 2019ൽ കമ്പനി ആസ്തി പെരുപ്പിച്ചുകാട്ടിയതായും കടം കുറച്ചുകാണിച്ചതായും റിപ്പോർട്ട്​ പുറത്തുവരുകയായിരുന്നു. പിന്നീട്​ സ്വതന്ത്ര അന്വേഷണത്തിൽ 440 കോടി ഡോളറിന്‍റെ കടമുള്ളതായി കണ്ടെത്തിയതിനെ തുടർന്ന്​ ഷെട്ടിയുടെ ആസ്തികൾ മരവിപ്പിക്കാൻ തീരുമാനിക്കുകയായിരുന്നു. ഇതിനെ തുടർന്ന്​ കമ്പനി അഡ്​മിനിസ്​ട്രേഷൻ ഭരണത്തിന്​ കീഴിലാവുകയും ചെയ്തു.