10 മാസം പ്രായമുള്ള കുഞ്ഞിന്​ കോവിഡ്​

മംഗളൂരു: ദക്ഷിണ കന്നടയിൽ 10 മാസം പ്രായമുള്ള കുഞ്ഞിന്​ കോവിഡ്​ 19 സ്​ഥിരീകിച്ചു. ബന്ത്​വാൾ സജിപനാടിലെ കുഞ്ഞിനാണ്​ രോഗം കണ്ടെത്തിയതെന്ന്​ ജില്ല ആരോഗ്യ കുടുംബക്ഷേമ ഓഫിസർ രാമചന്ദ്ര ബയാരി അറിയിച്ചു.

പനിയും കടുത്ത ശ്വാസംമുട്ടും ബാധിച്ച കുട്ടി​യെ മാർച്ച് 23ന് മംഗളൂരുവിലെ സ്വകാര്യ ആശുപത്രിയിൽ പ്രവേശിപ്പിച്ചതായിരുന്നു. കോവിഡ്​ ലക്ഷണത്തെതുടർന്ന്​ തൊണ്ടയിൽനിന്നുള്ള സ്രവം പരിശോധനക്കയച്ചു. ഇന്നാണ്​ ഫലം പുറത്തുവന്നത്​. കുട്ടിയുടെ ആരോഗ്യനില തൃപ്​തികരമാണെന്ന്​ രാമചന്ദ്ര വ്യക്​തമാക്കി.

കോവിഡ്​ സ്​ഥിരീകരിച്ചതോടെ രോഗവ്യാപനം തടയാൻ സജിപനാട് ഗ്രാമം ലോക്​ഡൗൺ ചെയ്​തു. ഗ്രാമത്തിൽ പ്രവേശിക്കാനോ പുറത്തുപോകാനോ ആരെയും അനുവദിക്കുന്നില്ല. കുട്ടിയുടെ അടുത്ത ബന്ധുക്കൾ നിരീക്ഷണത്തിലാണ്. സമ്പർക്കം പുലർത്തിയവരെ കണ്ടെത്താനുള്ള ശ്രമം പുരോഗമിക്കുകയാണെന്ന് വാർത്താകുറിപ്പിൽ അറിയിച്ചു.