ഇന്ത്യൻ നഗരങ്ങളിൽ ലഷ്കർ ചാവേറാക്രമണം നടത്താൻ സാധ്യത

ന്യൂഡൽഹി: രാജ്യ തലസ്ഥാനമയ ന്യൂഡൽഹി അടക്കമുള്ള ഇന്ത്യൻ നഗരങ്ങളിൽ ചാവേറാക്രമണത്തിന് സാധ്യതയുണ്ടെന്ന് ഡൽഹി പൊലീസ് മുന്നറിയിപ്പ് നൽകി. പാകിസ്താൻ കേന്ദ്രമാക്കി പ്രവർത്തിക്കുന്ന തീവ്രവാദ സംഘടന ലഷ്കർ ഇ ത്വയ്യിബയാണ് ആക്രമണം നടത്താൻ പദ്ധതിയിടുന്നതെന്ന് പൊലീസ് വ്യക്തമാക്കുന്നു.

ചാരവൃത്തിയുമായി ബന്ധപ്പെട്ട് സാബിർ എന്ന അധ്യാപകനെ കശ്മീരിൽ കഴിഞ്ഞ ദിവസം അറസ്റ്റ് ചെയ്തിരുന്നു. ഈ കേസിൽ ഡിസംബർ ഒന്നിന് പൊലീസ് സമർപ്പിച്ച എഫ്.ഐ.ആറിലാണ് ഭീകരാക്രമണ വിവരങ്ങളുള്ളത്. ആൾത്തിരക്കുള്ള നഗരമേഖലകളെ‍യും പ്രമുഖരെയുമാണ് തീവ്രവാദികൾ ലക്ഷ്യമിടുന്നത്. ഈ ദൗത്യവുമായി തീവ്രവാദികൾ പാക് അധീന കശ്മീരിൽ നിന്ന് ഇന്ത്യൻ അതിർത്തി കടന്നതായും റിപ്പോർട്ടിൽ പറയുന്നു.

ഇന്ത്യൻ സൈനികരെയും ചാരന്മാരെയും ഉപയോഗിച്ച് രാജ്യവുമായി ബന്ധപ്പെട്ട രഹസ്യ വിവരങ്ങൾ പാക് രഹസ്യാന്വേഷണ ഏജൻസിയായ ഐ.എസ്.ഐ ചോർത്തിയതിനെ കുറിച്ച് നേരത്തെ അന്വേഷണം നടന്നിരുന്നു. ഈ അന്വേഷണത്തിൽ നിന്നാണ് രാജ്യസുരക്ഷക്ക് ഭീഷണിയാകുന്ന വിവരങ്ങൾ ഡൽഹി പൊലീസിന് ലഭിച്ചത്.