ബാലികയെ രക്ഷിക്കാൻ ശ്രമിക്കുന്നതിനിടെ 30 പേർ കിണറ്റിൽ വീണു; മരണം നാലായി

വിദിഷ: മധ്യപ്രദേശിലെ വിദിഷ ജില്ലയിൽ 30 പേർ കിണറ്റിൽ വീണു. കിണറ്റിൽ അകപ്പെട്ട ബാലികയെ രക്ഷിക്കാനുള്ള ശ്രമത്തിനിടെയുണ്ടായ അപകടത്തിൽ നാല്​​ പേർ മരിച്ചു. ബാലനെ രക്ഷപ്പെടുത്താൻ ഒരുമിച്ചുകൂടിയ ജനങ്ങളുടെ ഭാരം താങ്ങാൻ കഴിയാതെ കിണറിന്‍റെ മുകൾഭാഗം തകർന്ന്​ വീഴുകയായിരുന്നു.

ജില്ല ആസ്​ഥാനത്ത്​ നിന്ന്​ 50 കിലോമീറ്റർ അകലെ ഗഞ്ച്​ ബസോദയിലാണ്​ അപകടമുണ്ടായത്​. 20 പേരെ രക്ഷപെടുത്തി. 10 ഇപ്പോഴും കിണറ്റിൽ കുടുങ്ങിക്കിടക്കുകയാണ്​. രക്ഷപെടുത്തിയവർക്ക്​ നേരിയ പരിക്കുകളുണ്ട്​. അഞ്ചുപേരെ ആശുപത്രിയിൽ പ്രവേശിപ്പിച്ചു.

രക്ഷാപ്രവർത്തനം പുരോഗമിക്കുകയാണെന്നും ഉദ്യോഗസ്​ഥരുമായി ബന്ധപ്പെടുന്നു​ണ്ടെന്നും മുഖ്യമന്ത്രി ശിവരാജ്​ സിങ്​ ചൗഹാൻ പറഞ്ഞു. ഉന്നതതല അന്വേഷണത്തിന്​ ഉത്തരവിട്ട മുഖ്യമന്ത്രി അപകടത്തിൽ പെട്ടവർക്ക്​ ഏറ്റവും മികച്ച ചികിത്സ നൽകാൻ നിർദേശം നൽകി.