യാത്രക്കാരന്​ കോവിഡ്​: എയർ ഏഷ്യ പൈലറ്റ്​ കോക്​പിറ്റിൽ നിന്ന്​ പുറത്തിറങ്ങിയത്​ എമർജൻസി എക്​സിറ്റ്​ വഴി

ന്യൂഡൽഹി: കോവിഡ്​ 19 രോഗബാധയുള്ള വ്യക്തി യാത്രചെയ്​തെന്ന സംശയത്തെ തുടർന്ന്​ എയർ ഏഷ്യ ഇന്ത്യ വിമാനത്തിലെ പൈലറ്റ്​ കോക്​പിറ്റിൽ നിന്നുള്ള എമർജൻസി എക്​സിറ്റ്​ വഴി പുറത്തിറങ്ങി. മാർച്ച് 20 ന് പുനെയിൽനിന്ന് ഡൽഹി രാജ്യാന്തര വിമാനത്തിൽ ഇറങ്ങിയ വിമാനത്തിലാണ്​ സംഭവം. കൊറോണ വൈറസ് ബാധ സംശയിക്കുന്ന യാത്രക്കാർ ഉണ്ടായിരുന്നതിനാൽ, ലാൻഡിങ്ങിന് ശേഷം പൈലറ്റ് ഇൻ കമാൻഡ് കോക്​പിറ്റി​​െൻറ സെക്കൻഡറി എക്സിറ്റ് ആയ സ്ലൈഡിങ് വിൻഡോ വഴി വിമാനത്തിൽ നിന്ന് പുറത്തിറങ്ങുകയായിരുന്നു.

പുനെയിൽ നിന്ന് ഐ 5-732 വിമാനത്തിൽ കോവിഡ് 19 രോഗബാധ സംശയിക്കുന്ന ഒരു യാത്രക്കാരൻ ഉണ്ടായിരുന്നു. ഇദ്ദേഹം ഒന്നാം നിരയിലെ സീറ്റിലാണ്​ ഇരുന്നിരുന്നത്​. സുരക്ഷ മുൻനിർത്തി ദൂരെയുള്ള റൺവേയിലാണ്​ വിമാനം ഇറക്കിയത്​. കോവിഡ്​ സംശയിക്കുന്നയാൾ മുന്നിലെ ഡോർവഴി ഇറങ്ങിയതിനാലാണ്​ സുരക്ഷ മുൻനിർത്തി പൈലറ്റ്​ സ്ലൈഡിങ് വിൻഡോ വഴി പുറത്തിറങ്ങിയതെന്ന്​ എയർ ഏഷ്യ ഇന്ത്യ വക്താവ് അറിയിച്ചു.

വിമാനത്തിലെ മറ്റ്​ യാത്രക്കാരെ പിൻവാതിലിലൂടെയാണ്​ ഇറക്കിയത്​. യാത്രക്കാരെ പിന്നീട് പരിശോധനക്ക്​ വിധേയമാക്കി. വിമാനവും അനുബന്ധ ഉപകരണങ്ങളും അണുനാശിനി ഉപയോഗിച്ച്​ വൃത്തിയാക്കിയതായും വിമാന ജീവനക്കാർക്ക്​ സമ്പർക്കവിലക്ക്​ ഏർപ്പെടുത്തിയതായും അധികൃതർ അറിയിച്ചു.