കോവിഡ്​ രണ്ടാം തരംഗത്തിൽ സംസ്ഥാനത്ത്​ മുട്ടയുടെ ഡിമാൻറും വിലയും വർധിച്ചു; പിന്നിലെ കാരണമിതാണ്​

ബംഗളുരു: കോവിഡ്​ രണ്ടാം തരംഗത്തിന്​ പിന്നാലെ മുട്ടയുടെ വില വർധിച്ചതിന്​ പിന്നിലെ കാരണം വെളിപ്പെടുത്തി അധികൃതർ. രണ്ടാം തരംഗത്തിൽ കർണാടകയിൽ മുട്ട വിൽപന കഴിഞ്ഞ വർഷത്തേക്കാൾ 10-15 ശതമാനമായി ഉയർന്നു. ഇതിന്​ പിന്നാലെ വിലയും വർധിച്ചെന്ന്​ മുട്ട വിൽപനക്കാരുടെ എകോപന സമിതി അധികൃതർ പറയുന്നു.

കോവിഡ്​ രോഗികളോട്​​ പ്രോട്ടീൻ കൂടുതലുള്ള മുട്ടയുൾപ്പയെുളള ഭക്ഷണങ്ങൾ കൂടുതൽ കഴിക്കാൻ ഡോക്​ട​ർമാർ നിർദേശിക്കാറുണ്ടായിരുന്നു. ഇതാണ്​ മുട്ട വിൽപന വർധിക്കാൻ കാരണമെന്നാണ്​ നാഷണൽ എഗ്​ കോഡിനേഷൻ കമ്മിറ്റി അധികൃതർ വിലയിരുത്തിയത്​.

വെള്ളിയാഴ്ച ബെംഗളൂരു, മൈസുരു എന്നിവിടങ്ങളിൽ ഒരു മുട്ടയുടെ ഫാം വില 5.50 രൂപയായിരുന്നു. രണ്ടാം തരംഗത്തിന് മുമ്പ് ഇത് ഏകദേശം 4 രൂപയായിരുന്നു. വെള്ളിയാഴ്ച മംഗളൂരുവിൽ ഒരു മുട്ടയുടെ ചില്ലറ വിൽപ്പന വില 6.50 രൂപയായിരുന്നു. ഏപ്രിൽ തുടക്കത്തിൽ ഇത് 4.50 രൂപയായിരുന്നുവത്രെ.

കർണാകടയിലെ പ്രതിദിന ​മുട്ട ഉത്​പാദനം 1.8 കോടിയാണ്​. സംസ്ഥാനത്തിന്​ പുറമെ കേരളം, ഗോവ, മഹാരാഷ്​ട്ര എന്നിവിടങ്ങളിലും ഇവ വിതരണം ചെയ്യുന്നുണ്ടെന്നും മൈസൂരുവിലെ നാഷണൽ എഗ്​ കോഡിനേഷൻ കമ്മിറ്റിയുടെ സെയിൽസ് പ്രൊമോഷൻ ഓഫീസർ വി.ശേശനാരായണ പറഞ്ഞു.

കോവിഡ് -19 ചിക്കനുമായി ബന്ധമുണ്ടെന്ന് സോഷ്യൽ മീഡിയയിൽ വ്യാജ സന്ദേശങ്ങൾ പ്രചരിച്ച കഴിഞ്ഞ വർഷം വിൽപനയിൽ ഇടിവുണ്ടായതായി വിൽപനക്കാർ പറയുന്നു.