പ്ലാറ്റ്​ഫോം ടിക്കറ്റ്​ നിരക്ക് ഇനി ഡി.ആർ.എമ്മുമാർക്ക് നിശ്ചയിക്കാനാകില്ല; റെയിൽവേ ബോർഡിന്‍റെ അടിയന്തര നീക്കം

തിരുവനന്തപുരം: പ്ലാറ്റ്​ഫോം ടിക്കറ്റ്​ നിരക്കുകൾ നിശ്ചയിക്കാനും ഭേദഗതി വരുത്താനുമുള്ള അധികാരം ഡിവിഷനൽ റെയിൽവേ മാനേജർമാരിൽനിന്ന്​ (ഡി.ആർ.എം) എടുത്തുമാറ്റി റെയിൽവേ ബോർഡിന്‍റെ നിർണായക നീക്കം. പ്ലാറ്റ്​ഫോം ടിക്കറ്റുകളുടെ മിനിമം നിരക്ക്​ 10​ രൂപയാണെങ്കിലും വിശേഷാവസരങ്ങളിൽ സ്​​റ്റേഷനുകളിലെ തിരക്ക്​ കുറക്കാൻ​ 50 രൂപ വരെ ഡി.ആർ.എമ്മുമാർ വർധിപ്പിക്കാറുണ്ട്​. യാത്രക്കാർക്ക്​ ഇരുട്ടടിയാകുന്ന അപ്രതീക്ഷിത വർധനക്കെതിരെ വ്യാപക പ്രതിഷേധമുയർന്ന സാഹചര്യത്തിലാണ്​ റെയിൽവേ ബോർഡിന്‍റെ അടിയന്തര നീക്കമെന്നാണ്​ വിവരം. തീരുമാനം എത്രയുംവേഗം​ നടപ്പാക്കണമെന്നാണ്​ ഉത്തരവിൽ പറയുന്നത്​.

2015ലാണ്​ പ്ലാറ്റ്​ഫോം ടിക്കറ്റുകൾക്ക്​ നിരക്ക്​ നിശ്ചയിക്കാനുള്ള അധികാരം ഡി.ആർ.എമ്മുമാർക്ക്​ നൽകിയത്​. സ്​​റ്റേ​ഷ​നു​ക​ളി​ലെ തി​ര​ക്കും പ്രാ​ദേ​ശി​ക സാ​ഹ​ച​ര്യ​വും ക​ണ​ക്കി​ലെ​ടു​ത്ത്​ ​അ​താ​ത്​ ഡി​വി​ഷ​ന​ൽ റെ​യി​ൽ​വേ മാ​നേ​ജ​ർ​മാ​ർ​ക്ക്​ നി​ര​ക്ക് നി​ശ്ച​യി​ക്കാ​മെ​ന്നാ​യിരുന്നു നി​ർ​ദേ​ശം. പ്ലാ​റ്റ്​​ഫോം ടി​ക്ക​റ്റു​ക​ളു​ടെ നി​ര​ക്ക്​ ഏ​കീ​കൃ​ത സ്വ​ഭാ​വ​മു​ള്ള​ത​ല്ലെ​ന്നും ആ​വ​ശ്യ​മെ​ങ്കി​ൽ മാ​റ്റാ​മെ​ന്നും 2019ൽ ​റെ​യി​ൽ​വേ ബോ​ർ​ഡ്​ സ​ർ​ക്കു​ല​റു​മുണ്ടായിരുന്നു. ഉത്സവ സീസണുകൾ, മേളകൾ തുടങ്ങിയ അവസരങ്ങളിൽ പ്ലാറ്റ്​​ഫോം ടിക്കറ്റ്​ നിരക്കുയർത്തി ആളുകൾ അനാവശ്യമായി സ്​റ്റേഷനുകളിൽ പ്രവേശിക്കുന്നത്​ തടയാനാണ്​ പല ഡിവിഷനുകളും ഈ സാധ്യത പ്രയോജനപ്പെടുത്തിയിരുന്നത്​.

കോവിഡിന്​ ശേഷം നിയന്ത്രണങ്ങളോടെ ട്രെയിനുകൾ ഓടിത്തുടങ്ങിയ ഘട്ടത്തിൽ ​സ്​റ്റേഷനുകളിലെ തിരക്ക്​ കുറക്കാൻ മിക്ക ഡിവിഷനുകളും പ്ലാറ്റ്​ഫോം നിരക്കുയർത്തി. വെ​സ്​​റ്റേ​ൺ റെ​യി​ൽ​വേ​യി​ലെ ര​ത്​​ലം ഡി​വി​ഷ​ന്​ കീ​ഴി​ൽ 135 സ്​​റ്റേ​ഷ​നു​ക​ളി​ലാ​ണ്​ ഇ​ന്ത്യ​ൻ റെ​യി​ൽ​വേ​യി​ൽ ആ​ദ്യ​മാ​യി കോ​വി​ഡ്​ മൂലം പ്ലാ​റ്റ്​​ഫോം ടി​ക്ക​റ്റ്​ നി​ര​ക്കു​യ​ർ​ത്തി​യ​ത്. ഇക്കഴിഞ്ഞ ദീപാവലി സീസണിലും പല ഡിവിഷനുകളും നിരക്ക്​ വർധിപ്പിച്ചിരുന്നു.

പാലക്കാട്​ ഡിവിഷനിൽ 2021 മേയ്​ ഒന്നുമുതൽ ജൂലൈ 31 വരെ പ്ലാറ്റ്​ഫോം ടിക്കറ്റിന്​ 50 രൂപയാക്കിയിരുന്നു. തിരക്ക്​ നിയന്ത്രിക്കലെന്ന ലക്ഷ്യത്തിന്​ പകരം​ വരുമാന വർധനക്കുള്ള മാർഗമെന്ന നിലയിലേക്ക്​ പല ഡിവിഷനുകളും ഈ സൗകര്യത്തെ കണ്ട്​ തുടങ്ങിയതിനെതിരെ വ്യപക പ്രതിഷേധമാണുയർന്നത്​. 50 കിലോമീറ്റർ വരെ സഞ്ചരിക്കാൻ 30 രൂപയുടെ ലോക്കൽ ടിക്കറ്റെടുത്താൽ മതിയെന്നിരിക്കെയാണ്​ നിരക്ക്​ വർധന.