ഡി.എം.കെയിൽനിന്ന് കമ്യൂണിസ്റ്റ് പാർട്ടികൾ 25 കോടി കൈപറ്റി; ആരോപണവുമായി കമൽ ഹാസൻ
text_fields
കോയമ്പത്തൂർ: സി.പി.ഐ, സി.പി.എം പാർട്ടികൾക്കും സി.പി.എം ജനറൽ സെക്രട്ടറി സീതാറാം യെച്ചൂരിക്കുമെതിരെ വിമർശനവുമായി മക്കൾ നീതി മയ്യം നേതാവും സിനിമ നടനുമായ കമൽഹാസൻ. നിരവധി തവണ ഇടത് പാർട്ടികളുമായി സഖ്യത്തിന് ശ്രമിച്ചെങ്കിലും തന്‍റെ രാഷ്ട്രീയ പ്രവേശനത്തെ സീതാറാം യെച്ചൂരി വിലകുറച്ചുകണ്ടുവെന്നും കമൽ ഹാസൻ പറഞ്ഞു.
ഡി.എം.കെയിൽ നിന്നും മൊത്തം 25 കോടി രൂപ വാങ്ങിയാണ് സി.പി.ഐയും സി.പി.എമ്മും മുന്നണിയിൽ ചേർന്നതെന്നും റൊട്ടിയും ബണ്ണും മാത്രം ആഗ്രഹിക്കുന്ന സഖാക്കൾ ഇങ്ങനെ ആയതിൽ വിഷമമുണ്ടെന്നും കമൽ ഹാസൻ പറഞ്ഞു. സ്റ്റാലിൻ വിശ്വസിക്കാൻ കഴിയാത്തയാളാണെന്നും കമൽ ഹാസൻ വിമർശനം ഉന്നയിച്ചിട്ടുണ്ട്.
നേരത്തേ കേരള സർക്കാറിനെയും മുഖ്യമന്ത്രി പിണറായി വിജയനെയും പുകഴ്ത്തി കമൽഹാസൻ പലകുറി രംഗത്ത് വന്നിരുന്നു. കോയമ്പത്തൂർ സൗത്ത് മണ്ഡലത്തിലാണ് ഇക്കുറി കമൽഹാസൻ ജനവിധി തേടുന്നത്. മഹിളാ മോർച്ച ദേശീയ പ്രസിഡന്‍റ് വനതി ശ്രീനിവാസനും കോൺഗ്രസിന്‍റെ മയൂരി ജയകുമാറുമാണ് എതിരാളികൾ.