ജനിതകമാറ്റം സംഭവിച്ച കൊറോണ വൈറസ്​​; ചികിത്സ രീതിയിൽ മാറ്റം വേണ്ടെന്ന്​ വിദഗ്​ധസംഘം

ന്യൂഡൽഹി: യു.കെയിൽ ജനിതകമാറ്റം സംഭവിച്ച കൊറോണ വൈറസ്​ കണ്ടെത്തിയ സാഹചര്യത്തിൽ ഇന്ത്യയിലെ കോവിഡ്​ ചികിത്സ രീതിയിൽ മാറ്റം വേണ്ടെന്ന്​ വിദഗ്​ധ സംഘം. നിലവിലുള്ള ചികിൽസ രീതി തന്നെ തുടരണമെന്ന്​ കോവിഡിനായുള്ള നാഷണൽ ടാസ്​ക്​ ഫോഴ്​സ്​ അറിയിച്ചു.

ഐ.സി.എം.ആറിന്‍റെ നേതൃത്വത്തിലാണ്​ ടാസ്​ക്​ ഫോഴ്​സിന്‍റെ യോഗം നടന്നത്​. ഡോ.വിനോദ്​ പോൾ, നീതി ആയോഗ്​ അംഗം, ഐ.സി.എം.ആർ പ്രതിനിധി ഡോ.ബൽറാം ഭാർഗവ എന്നിവർ യോഗത്തിൽ പ​ങ്കെടുത്തിരുന്നു. ജനിതകമാറ്റം സംഭവിച്ച വൈറസ്​ കണ്ടെത്തുന്നതിന്​ നിരീക്ഷണം ശക്​തമാക്കും. സാമൂഹിക അകലം, വ്യക്​തിശുചിത്വം, മാസ്​ക്​ ധരിക്കൽ തുടങ്ങിയവ ശീലമാക്കണമെന്നും യോഗത്തിൽ നിർദേശമുയർന്നു.

യു.കെയിലെ ജനിതകമാറ്റം സംഭവിച്ച വൈറസിന്‍റെ സാന്നിധ്യം ഇന്ത്യയിൽ കണ്ടെത്തിയിരുന്നു. അതിവേഗം പടരുന്നതാണ്​ പുതിയ വൈറസെന്നാണ്​ റിപ്പോർട്ട്​.