ഇന്ത്യക്കാരുടെ വിദേശ ആസ്​തി​ അന്വേഷിക്കാൻ ആദായ നികുതി വകുപ്പിന്​ പ്രത്യേക യൂനിറ്റ്​

ന്യൂഡൽഹി: ഇന്ത്യക്കാരുടെ വിദേശത്തെ ആസ്​തികളും കള്ളപ്പണ നിക്ഷേപവും അന്വേഷിക്കാൻ ആദായ നികുതി വകുപ്പ്​ പ്രത്യേക യൂനിറ്റ്​ രൂപവത്​കരിച്ചു. ആദായ നികുതി വകുപ്പി​‍െൻറ 14 അന്വേഷണ ഡയറക്​ടറേറ്റുകളിൽ പ്രവർത്തിക്കുന്ന​ ഫോറിൻ അസറ്റ്​ ഇൻവെസ്​റ്റിഗേഷൻ യൂനിറ്റിന്​​ (എഫ്​.എ.ഐ.യു)​ കീഴിലാണ്​ കേന്ദ്ര സർക്കാർ പ്രത്യേക സംഘത്തിന്​ രൂപം നൽകിയത്​.

നിലവിൽ നികുതി വെട്ടിപ്പ്​ കണ്ടെത്താൻ പരിശോധനക്കും ജപ്​തി നടപടികൾക്കും ആവശ്യമായ​ പ്രാഥമിക നടപടികൾ മാത്രമാണ്​ എഫ്​.എ.ഐ.യു ഏറ്റെടുത്തു വരുന്നത്​​. എന്നാൽ, ഇന്ത്യക്കാർ കൈവശം വെച്ചു വരുന്ന വിദേശ ആസ്​തികളുമായി ബന്ധപ്പെട്ട കേസുകളിലും കള്ളപ്പണ നിക്ഷേപം സംബന്ധിച്ച കേസുകളിലും ശ്രദ്ധ കേന്ദ്രീകരിക്കുകയെന്നതാണ്​ പുതിയ സംഘത്തി​‍െൻറ ചുമതല. അടുത്തിടെ ചോർന്ന പാനമ രേഖകളിൽ നിരവധി സ്​ഥാപനങ്ങളുടെ വിദേശ നിക്ഷേപങ്ങളെ കുറിച്ച്​​ പരാമർശമുണ്ടായിരുന്നു. അത്തരം സ്​ഥാപനങ്ങളെക്കുറിച്ചും സംഘം അന്വേഷിക്കു​െമന്നാണ്​ ആദായ നികുതി വകുപ്പ്​ ഉദ്യോഗസ്ഥർ പറയുന്നത്​.

കഴിഞ്ഞ നവംബറിൽ ധനമന്ത്രി നിർമല സീതാരാമൻ പുതിയ അന്വേഷണ യൂനിറ്റിന്​ അനുമതി നൽകിയതിന്​ പിന്നാലെ 69 തസ്​തികകൾ കേന്ദ്ര പ്രത്യക്ഷ നികുതി ബോർഡ്​ (സി.ബി.ഡി.ടി) നീക്കിവെച്ചിരുന്നു. നിലവിൽ രാജ്യങ്ങളുമായി ഒപ്പുവെച്ച കരാറുകളുടെ പിൻബലത്തിൽ വിദേശത്ത്​ ആസ്​തികൾ കൈവശം വെക്കുന്നവരുടെ വിവരങ്ങൾ ഇന്ത്യക്ക്​ ലഭിക്കുന്നുണ്ട്​. ആഗോള തലത്തിൽ വിവരങ്ങൾ കൈമാറുന്ന രാജ്യങ്ങളിൽ ഇന്ത്യയും ഉൾപ്പെട്ടിട്ടുണ്ട്​.