പൗരത്വ സമരം: ദേവാംഗനയുടെ​ ജാമ്യം സുപ്രീം കോടതി ശരിവെച്ചു; ആസിഫ്​ തൻഹയുടെ ജാമ്യാപേക്ഷ തള്ളി

ന്യൂഡൽഹി: പൗരത്വ ഭേദഗതി നിയമത്തിനെതിരായ സമരത്തിൽ പ​ങ്കെടുത്തതിന്​ അറസ്​റ്റിലായ പിഞ്ച്​റ തോഡ്​ നേതാവ്​​ ​േദവാംഗന കലിതക്ക്​ ജാമ്യം അനുവദിച്ച ഡൽഹി ഹൈകോടതി വിധി സുപ്രീംകോടതി ശരിവെച്ചു. അതേസമയം, ജാമിഅ മില്ലിയ ഇസ്​ലാമിയയില്‍ പൗരത്വ സമരത്തി‍​​​െൻറ നേതൃനിരയിലുണ്ടായിരുന്ന എസ്​.ഐ.ഒ നേതാവ്​ ആസിഫ്​ തൻഹ സമർപ്പിച്ച ജാമ്യാപേക്ഷ ഡൽഹി കകർഡുമ കോടതി രണ്ടാമതും തള്ളി. ഇന്ത്യക്കെതിരെ അതൃപ്​തിയുണ്ടാക്കാൻ സംഘടിപ്പിച്ചതാണ്​ പൗരത്വ സമരമെന്നാണ്​ ജാമ്യാപേക്ഷ നിരസിച്ച്​ കോടതി അഭിപ്രായപ്പെട്ടത്​.

സെപ്​തംബർ ഒന്നിനാണ്​ ഡൽഹി കോടതി​ ദേവാംഗന കലിതക്ക് ജാമ്യം അനുവദിച്ചത്​. എന്നാൽ, ഇതിനെതിരെ ഡൽഹി ​പൊലീസ്​ സുപ്രീം കോടതിയെ സമീപിക്കുകയായിരുന്നു. ജാമ്യം ലഭിച്ചെങ്കിലും യു.എ.പി.എ അടക്കം ചുമത്തിയ നാല്​ കേസുകളുള്ളതിനാൽ ​ ജയിലിൽനിന്ന്​ പുറത്തിറങ്ങാനായിരുന്നില്ല. പ്രതി സ്വാധീനമുള്ളയാളാണെന്നും തെളിവ്​ നശിപ്പിക്കുമെന്നുമായിരുന്നു സുപ്രീം കോടതിയിൽ ഡൽഹി പൊലീസിനുവേണ്ടി ഹാജരായ അഡീഷനൽ സോളിസിറ്റർ എസ്​.വി രാജുവി​െൻറ വാദം. അതിനാൽ ജാമ്യം നൽകരുതെന്നും അദ്ദേഹം ആവശ്യപ്പെട്ടു. എന്നാൽ, പിഞ്ച്​റ തോഡ്​ നേതാവ്​ ഓടിയൊളിക്കില്ലെന്നും ഹൈകോടതി അനുവദിച്ച ജാമ്യം നിഷേധിക്കുന്നില്ലെന്നും ജസ്​റ്റിസ്​ അശോക്​ ഭൂഷൺ അധ്യക്ഷനായ സുപ്രീംകോടതി ബെഞ്ച്​ വ്യക്തമാക്കി. ദേവാംഗന തെളിവ്​ നശിപ്പിക്കുന്നതായി കണ്ടാൽ ജാമ്യം റദ്ദാക്കാൻ കോടതിയെ സമീപിക്കാൻ പൊലീസിന്​ സ്വാതന്ത്ര്യമുണ്ടെന്നും സുപ്രീംകോടതി കൂട്ടിച്ചേർത്തു.

ജാഫ്രാബാദിൽ മെട്രോ സ്​റ്റേഷനിൽ കുത്തിയിരിപ്പ്​ സമരം നടത്തിയതിന്​ ഫെബ്രുവരി 24 ന് രജിസ്റ്റർ ചെയ്ത എഫ്.ഐ.ആർ അനുസരിച്ചാണ്​ പിഞ്ച്​റ തോഡ്​ നേതാക്കളായ ദേവാംഗനയെയും നതാഷ നർവാളിനെയും മേയ്​ 23ന്​ അറസ്റ്റ് ചെയ്തത്​. ഇൗ കേസിൽ മേയ്​ 25ന്​ ഡൽഹി മെട്രോപൊളിറ്റൻ മജിസ്‌ട്രേറ്റ് അജിത് നാരായണൻ ഇരുവർക്കും ജാമ്യം അനുവദിച്ചിരുന്നു. തുടർന്ന്​ നാടകീയമായി ക്രൈംബ്രാഞ്ച്​ രംഗപ്രവേശം ചെയ്​ത്​ ഇരുവർക്കുമെതിരെ ഡൽഹി കലാപത്തിൽ യു.എ.പി.എ ചുമത്തി കേസെടുത്തു. കലാപം, കൊലപാതകം എന്നിവയിൽ ഇരുവർക്കും ബന്ധമുണ്ടെന്നാരോപിച്ച്​ 147, 353, 307, 302 വകുപ്പുകളാണ്​ ഇവ​ർക്കെതിരെ ചുമത്തിയത്​. നതാഷക്ക്​ ജാമ്യം ലഭിച്ചിട്ടില്ല.

ജാമിഅ കോഓഡിനേഷന്‍ കമ്മിറ്റി അംഗം കൂടിയായ ആസിഫ്​ തൻഹ (27) മേയ്​ 21നാണ്​ അറസ്​റ്റിലായത്​. ഇദ്ദേഹത്തിനെതിരെയും യു.എ.പി.എ ചുമത്തിയിട്ടുണ്ട്​. പൗരത്വ സമരത്തിലൂടെയും മറ്റ്​ അക്രമ പ്രവർത്തനങ്ങളിലൂടെയും ആസിഫ് ഇന്ത്യക്കെതിരെ അതൃപ്​തി വളർത്തുകയായിരുന്നുവെന്ന്​ ജാമ്യാപേക്ഷ പരിഗണിക്കവേ കകർഡുമ അഡീഷനൽ സെഷൻസ്​ ജഡ്​ജി അമിതാഭ്​ റാവത്ത്​ പറഞ്ഞു​. ഇന്ത്യയുടെ ഐക്യത്തിനും അഖണ്ഡതക്കും ഭീഷണിയാണ്​ ഇത്തരം പ്രവർത്തനങ്ങളെന്നും അതും ഭീകരപ്രവൃത്തിയാണെന്നും ജഡ്​ജി കൂട്ടിച്ചേർത്തു.