ഛത്തീസ്​ഗഡിൽ വീണ്ടും കാട്ടാന കൊല്ലപ്പെട്ടു; ഒരാഴ്​ചക്കിടെ അഞ്ചാനകൾക്ക് ജീവഹാനി​

റായ്​പൂർ: ഛത്തീസ്​ഗഡിലെ റായ്​ഗഡ്​, ധംതാരി ജില്ലകളിൽ ചൊവ്വാഴ്​ച രണ്ട് കാട്ടാനകളെ കൂടി ചെരിഞ്ഞ നിലയിൽ കണ്ടെത്തി. റായ്​ഗഡിലെ കൃഷിത്തോട്ടത്തിൽ വൈദ്യുതി കമ്പിയിൽനിന്ന്​ ഷോക്കേറ്റാണ്​ ​കൊമ്പനാന കൊല്ലപ്പെട്ടത്​. ധംതാരിയിലെ ചതുപ്പുനിലത്തിൽ കുടുങ്ങി ഒരു കുട്ടിയാന​യുടെയും ജീവൻ പൊലിഞ്ഞു. ഇതോടെ ഒരാഴ്ചക്കിടെ അഞ്ച് ആനകൾക്കാണ്​ സംസ്ഥാനത്ത് ജീവഹാനി സംഭവിച്ചത്​. 

റായ്​ഗഡ്​ ധരംജൈഗർ വനം ഡിവിഷന് കീഴിലുള്ള ഗിരിഷ ഗ്രാമത്തിൽ ചൊവ്വാഴ്ച പുലർച്ചെയാണ് തുമ്പിക്കൈ വൈദ്യുതികമ്പിയിൽ തട്ടി കൊമ്പൻ ചെരിഞ്ഞത്​. 27 ആനകളുടെ കൂട്ടം കഴിഞ്ഞ രണ്ട് ദിവസമായി ഇവിടെ കറങ്ങുന്നുണ്ടായിരുന്നെന്ന്​ റായ്​ഗഡ്​ പൊലീസ് സൂപ്രണ്ട് സന്തോഷ് സിങ്​ പറഞ്ഞു. 

കൃഷിത്തോട്ടത്തിൽ കുഴൽകിണറിന്​ വേണ്ടി എടുത്ത അനധികൃത വൈദ്യുതി കണക്ഷനിൽനിന്നാണ്​ ഷോക്കേറ്റതെന്നാണ്​  പ്രാഥമിക വിവരം. റായ്പൂരിൽനിന്ന് 250 കിലോമീറ്റർ അകലെയാണ്​ സംഭവം. മരണകാരണം കൃത്യമായി അറിയാൻ പോസ്റ്റ്‌മോർട്ടം റിപ്പോർട്ട് കാത്തിരിക്കുകയാണെന്നും അദ്ദേഹം പറഞ്ഞു. ഫാം ഉടമയെയും മറ്റൊരാളെയും ചോദ്യം ചെയ്യലിനായി കസ്റ്റഡിയിലെടുത്തിട്ടുണ്ട്.

തലസ്ഥാനത്ത് നിന്ന് 100 കിലോമീറ്റർ അകലെ ധാംതാരിയിലെ ഗാംഗ്രെൽ അണക്കെട്ടിൻെറ സംഭരണ മേഖലയിലെ ചതുപ്പുനിലത്തിലാണ്​ കുട്ടിയാന മരിച്ചത്​. വെള്ളം കുടിക്കാൻ പോകുമ്പോൾ ചെളിയിൽ കുടുങ്ങിയതാകാനാണ്​ സാധ്യതയെന്നും അദ്ദേഹം പറഞ്ഞു.

ജൂൺ 9, 10 തീയതികളിൽ സൂരജ്​പൂർ ജില്ലയിലെ പ്രതാപ്​പൂർ വനമേഖലയിൽനിന്ന്​ രണ്ട് ആനകളുടെയും ജൂൺ 11ന് ബൽ‌റാംപൂർ ജില്ലയിൽ മറ്റൊരു ആനയുടെയും ജഡം കണ്ടെത്തിയിരുന്നു. സംഭവത്തിൽ സംസ്ഥാന വനം വകുപ്പിലെ മൂന്ന് ഉദ്യോഗസ്ഥരെയും ഒരു ഗാർഡിനെയും സസ്പെൻഡ് ചെയ്തിരുന്നു.