ഡിവില്ലിയേഴ്​സ് മിന്നി​; കൊൽക്കത്തയുടെ കഥ കഴിച്ച്​ ബാംഗ്ലൂർ

ഷാർജ: ബാറ്റെടുത്തവരും പന്തെടുത്തവരും തങ്ങളുടെ റോൾ കൃത്യമായി നിർവഹിച്ചതോടെ കൊൽക്ക​ത്ത നൈറ്റ്​റൈഡേഴ്​സിനെതിരെ റോയൽ ചലഞ്ചേഴ്​സ്​ ബാംഗ്ലൂരിന്​ 82 റൺസ്​ ജയം. ആദ്യം ബാറ്റുചെയ്​ത ബാംഗ്ലൂർ 33 പന്തിൽ നിന്നും 73 റൺസുമായി പുറത്താകാതെ നിന്ന എബി ഡിവില്ലിയേഴ്​സിൻെറ വെടിക്കെട്ട്​ ഇന്നിങ്​സിൻെറ ബലത്തിൽ 20 ഓവറിൽ രണ്ട്​ വിക്കറ്റ്​ മാത്രം നഷ്​ടപ്പെടുത്തി 194 റൺസെടുത്തു. കൊൽക്കത്തയുടെ മറുപടി 20 ഓവറിൽ ഒമ്പതിന്​ 112 എന്ന സ്​കോറിൽ അവസാനിച്ചു. ശുഭ്​മാൻ ഗിൽ (34), ആ​ന്ദ്രേ റസൽ (16), രാഹുൽ ത്രിപാഠി (16) എന്നിവർ മാത്രമാണ്​ രണ്ടക്കം കടന്നത്​.

ഏഴ്​ കളികളിൽ നിന്ന്​ 10 പോയൻറുമായി ബാംഗ്ലൂർ മൂന്നാം സ്​ഥാനത്തെത്തി. മുംബൈ ഇന്ത്യൻസിനും ഡൽഹി ക്യാപിറ്റൽസിനും അതേ പോയൻറാണെങ്കിലും നെറ്റ്​റൺറേറ്റിൻെറ അടിസ്​ഥാനത്തിൽ മുംബൈ ഒന്നാം സ്​ഥാനം അലങ്കരിക്കുന്നു.എട്ട്​ പോയൻറുമായി കൊൽക്കത്ത നാലാമതുണ്ട്​.

യൂസ്​വേന്ദ്ര ചഹൽ- വാഷിങ്​ടൺ സുന്ദർ സ്​പിൻ ദ്വയത്തിൻെറ പന്തുകൾക്ക്​ മുന്നിൽ പകച്ച ​കെ.കെ.ആർ ബാറ്റ്​സ്​മാൻമാർക്ക്​​ മികച്ച ഒരു കൂട്ടുകെട്ട്​ പോലും പടുത്തുയർത്താനായില്ല. ബാംഗ്ലൂരിനായി പന്ത്​ കൈയ്യിലെടുത്തവർക്കെല്ലാം വിക്കറ്റ്​ സമ്മാനിച്ചാണ്​ കൊൽക്കത്തക്കാർ വിട്ടത്​. വാഷിങ്​ടൺ സുന്ദറും ക്രിസ്​ മോറിസും രണ്ട്​ വിക്കറ്റ്​ വീഴ്​ത്തി. നവ്​ദീപ്​ സെയ്​നി, മുഹമ്മദ്​ സിറാജ്​, ചഹൽ, ഉഡാന എന്നിവർ ഓരോ വിക്കറ്റെടുത്തു.

നേരത്തെ ആരോൺ ഫിഞ്ച്​ (47), ദേവ്​ദത്ത്​ പടിക്കൽ (32), നായകൻ വിരാട്​ കോഹ്​ലി (33 നോട്ടൗട്ട്​) എന്നിങ്ങനെ ബാറ്റെടുത്തവരെല്ലാം ബാംഗ്ലൂരിനായി തിളങ്ങി. അവസാന അഞ്ചോവറിൽ 83 റൺസാണ്​ ​എ.ബി.ഡിയും കോഹ്​ലിയും ചേർന്ന്​ കൂട്ടിച്ചേർത്തത്​. അഞ്ച്​ ഫോറുകളും ആറ്​ സിക്​സുകളും ചാരുതയേകിയതായിരുന്നു ഡിവില്ലിയേഴ്​സിൻെറ ഇന്നിങ്​സ്.

ആദ്യ 11 പന്തിൽ വെറും 10 റൺസായിരുന്നു താരത്തിൻെറ സമ്പാദ്യം. തുടർന്നങ്ങോട്ട്​ സിക്​സറുകളുടെയും ഫോറുകളുടെയും മാലപ്പടക്കമായിരുന്നു. 23 പന്തിലായിരുന്നു അർധസെഞ്ച്വറി. ​കൊൽക്കത്തക്കായി പ്രസീദ്​ കൃഷ്​ണയും ആന്ദ്രേ റസലും ഓരോ വിക്കറ്റ്​ വീഴ്​ത്തി.

സുനിൽ നരെയ്​ൻ ഇല്ലാതെയാണ്​ കൊൽക്കത്ത കളത്തിലിറങ്ങിയത്​. ഇംഗ്ലീഷ്​ വെടിക്കെട്ട്​ താരം ടോം ബാൻറൺ കൊൽക്കത്തൻ ടീമിലും മുഹമ്മദ്​ സിറാജ്​ ബാംഗ്ലൂർ ടീമിലുമെത്തി.