ഉന്നത നീതിപീഠത്തിന്‍റെ അംഗീകാരത്തിൽ സന്തോഷം: വി.എം. സുധീരൻ

തിരുവനന്തപുരം: സംസ്ഥാന സർക്കാരിന്‍റെ മദ്യനയം ഉന്നതനീതിപീഠം അംഗീകരിച്ചതിൽ സന്തോഷമുണ്ടെന്ന് കെ.പി.സി.സി പ്രസിഡന്‍റ് വി.എം സുധീരൻ. വിധി നൂറു ശതമാനവും യു.ഡി.എഫ് സർക്കാരിന്‍റെ വിജയമാണ്. യു.ഡി.എഫ് സർക്കാരിന് പിന്തുണ നൽകിയ ജനങ്ങൾക്കും ഈ വിധിയിൽ അഭിമാനിക്കാം. കൂട്ടായ്മയുടെ വിജയമാണിത്.

വിധി പ്രഖ്യാപനത്തിലൂടെ മദ്യവിൽപന മൗലികാവകാശമല്ല എന്ന തീരുമാനം ഒരിക്കൽകൂടി വ്യക്തമാക്കുകയാണ് സുപ്രീംകോടതി. നയം പ്രായോഗികമല്ല എന്ന് പറഞ്ഞവർക്കുള്ള മറുപടി കൂടിയാണിത്. ഈ തീരുമാനം നടപ്പിലാക്കാനാവശ്യമായ കരുത്ത് യു.ഡി.എഫ് സർക്കാരിനുണ്ട്.

നാടിനെ സ്നേഹിക്കുന്ന, ജനതാൽപര്യമുള്ള എല്ലാവരും കോടതി വിധി അംഗീകരിക്കും. കെ. കരുണാകരൻ ആവിഷ്കരിച്ച് എ.കെ ആന്‍റണി മുന്നോട്ടു കൊണ്ടുപോയ മദ്യനയത്തിന് ഇപ്പോൾ സുപ്രീംകോടതിയുടെ അംഗീകാരം ലഭിച്ചിരിക്കുകയാണെന്നും സുധീരൻ മാധ്യമപ്രവർത്തകരോട് പറഞ്ഞു.