'വാപ്പ മരിച്ച് കിടക്കുകയാണ്... എനിക്ക് കാണണം'; ദുബൈയിൽ നിന്നുള്ള എയർ ഇന്ത്യ എക്‌സ്പ്രസ് വൈകിയതോടെ യാത്രക്കാർ ദുരിതത്തിൽ

ദുബൈ: വർഷങ്ങളായി തുടരുന്ന യാത്ര ദുരിതത്തിന്​ അറുതി കാണാനാവാതെ എയർ ഇന്ത്യൻ എക്സ്​പ്രസ്​. ബുധനാഴ്ച ദുബൈയിൽ നിന്ന്​ തിരുവനന്തപുരത്തേക്ക്​ പുറപ്പെടേണ്ട എയർ ഇന്ത്യ എക്സ്​പ്രസിന്‍റെ ഐ.എക്സ്​ 530 വിമാനം മണിക്കൂറുകൾ വൈകിയ ശേഷം മുന്നറിയിപ്പില്ലാതെ സർവിസ്​ റദ്ദാക്കി. ബുധനാഴ്ച രാവിലെ 6.05ന് തിരുവനന്തപുരത്തേക്ക് പുറപ്പെടേണ്ടിയിരുന്ന എയർഇന്ത്യ എക്സ്പ്രസ് വിമാനമാണ്​ യാത്രക്കാരെ കണ്ണീരാഴ്ത്തിയത്​.

ഇതോടെ 150ഓളം വരുന്ന യാത്രക്കാർ പകൽ മുഴുവൻ വിമാനത്താവളത്തിൽ കുടുങ്ങി. പിതാവിന്‍റെ മരണാനന്തര ചടങ്ങിൽ പങ്കെടുക്കേണ്ടവരും യാത്രക്കാരിലുണ്ടായിരുന്നു. സാ​ങ്കേതിക കാരണങ്ങളാണ്​ വൈകാൻ കാരണമെന്നാണ്​ ഔദ്യോഗിക വിശദീകരണം. എന്നാൽ, ഇക്കാര്യം യാത്രക്കാരെ മുൻകൂട്ടി അറിയിച്ചിരുന്നില്ല. വിമാനത്തിൽ കയറിയ ശേഷമാണ്​ യാത്രക്കാർ സർവിസ്​ വൈകുന്നത്​ സംബന്ധിച്ച വിവരം അറിയുന്നത്​.

തുടർന്ന്​ 15 മണിക്കൂറിലധികം യാത്രക്കാർ വിമാനത്താവളത്തിൽ കുടുങ്ങി. ഏറെ നേരത്തിന്​ ശേഷം മറ്റൊരു വിമാനത്തിൽ യാത്രക്കാരെ മുഴുവൻ കയറ്റിയെങ്കിലും വീണ്ടു പുറത്തിറക്കുകയായിരുന്നു. വൈകുന്നേരത്തോടെയാണ്​ സർവിസ്​ റദ്ദാക്കിയതായി എയർ ഇന്ത്യ എക്സ്​പ്രസ്​ അറിയിച്ചത്​. പകരം സംവിധാനമൊരുക്കാനും ആദ്യം അധികൃതർ തയ്യാറായിരുന്നില്ല.

പിതാവിന്‍റെ മരണാനന്തര ചടങ്ങിൽ പ​ങ്കെടുക്കാൻ പോയ യാത്രക്കാരൻ വിമാനത്തിൽ നിയന്ത്രണം വിട്ട്​ കരയുന്നതിന്‍റെ ദൃശ്യങ്ങളും പുറത്തുവന്നിരുന്നു. നേരത്തെ വിവരം അറിയിച്ചിരുന്നെങ്കിൽ മറ്റൊരു വിമാനത്തിൽ യാത്ര പോകാ​മായിരുന്നുവെന്നാണ്​ ഇദ്ദേഹം പറയുന്നത്​. പ്രതിഷേധം ശക്​തമായതോടെ വിഷയത്തിൽ ദുബൈ വിമാനത്താവളം പൊലീസ്​ ഇടപെട്ട്​ ചർച്ച നടത്തുകയായിരുന്നു. തുടർന്നാണ്​ യാത്രക്കാരെയെല്ലാം ഹോട്ടലിലേക്ക് മാറ്റാൻ എയർ ഇന്ത്യ എക്സ്​പ്രസ്​ അധികൃതർ തയാറായത്​. വ്യാഴാഴ്ച രാവിലെ ഏഴരക്കുള്ള മറ്റൊരു വിമാനത്തിൽ യാത്രക്കാരെ തിരുവനന്തപുരത്ത്​ എത്തിക്കുമെന്നാണ്​ പിന്നീട്​ ലഭിച്ച അറിയിപ്പ്​ എന്ന്​ യാത്രക്കാർ പറയുന്നു.