ഷോക്കേറ്റ്​ വീണത്​ ആംബുലൻസിന്​ മുന്നിൽ; അലിയാർക്കിത് രണ്ടാം ജന്മം

കട്ടപ്പന: വൈദ്യുതി ലൈനിൽ നിന്ന് ഷോക്കേറ്റ്​ നിർത്തിയിട്ട ആംബുലൻസിന് മുമ്പിൽ വീണ കെ. എസ്.ഇ.ബി ജീവനക്കാരന് കനിവ് 108 ആംബുലൻസ് ജീവനക്കാർ രക്ഷകരായി. കെ.ഫോൺ ലൈൻ ജോലിക്കിടെ ലൈൻമാൻ ഇടുക്കി ചെറുതോണി സ്വദേശി അലിയാരാണ് (50) വൈദ്യുതി ആഘതമേറ്റ് ആംബുലൻസിനു മുമ്പിൽ വീണത്.

അടിമാലി - കുമളി ദേശീയ പാത 185 - ൽ കട്ടപ്പന വാഴവരയിൽ ഇന്നലെ ഉച്ചകഴിഞ്ഞു ഒരു മണിയോടെ യാണു സംഭവം. ലൈൻ വലിക്കുന്നതിനിടെയാണ്​ അലിയാർക്ക് ഷോക്കേറ്റത്​. റോഡിനു കുറുകെ ലൈൻ കമ്പികൾ കിടന്നതിനാൽ ഈ സമയം ഇടുക്കിയിൽ നിന്ന് തിരികെ വരികയായിരുന്ന 108 ആംബുലൻസ് നിർത്തിയിടേണ്ടി വന്നു.

ഒപ്പം മറ്റു വാഹനങ്ങളും. റോഡ് ബ്ലോക്ക്‌ ഒഴിവാക്കാൻ വൈദ്യുതി പോസ്​റ്റിനു മുകളിൽ നിന്ന്​ കമ്പി മാറ്റാൻ ശ്രമിക്കുന്നതിനിടെയാണ് ലൈൻമാനു ഷോക്കേൽക്കുന്നത്. ആംബുലൻസിനു മുമ്പിൽ റോഡിലേക്ക് ലൈൻമാൻ വീഴുന്നതുകണ്ട് ജീവനക്കാക്കാർ ഓടിയെത്തി.

പൈലറ്റ് ഷിനോസ് രാജൻ, എമർജൻസി മെഡിക്കൽ ടെക്‌നീഷ്യൻ അനൂപ് ജോർജ് എന്നിവരാണ് ആംബുലൻസിൽ ഉണ്ടായിരുന്നത്. അബോധാവസ്‌ഥയിൽ വീണ അലിയാരുടെ ഹൃദത്തി​െൻറ പ്രവർത്തനം ഒരു നിമിഷത്തേക്ക് നിലച്ചു പോയിരുന്നു. ജീവനക്കാർ അടിയന്തിര ജീവൻ രക്ഷപ്രവർത്തനം നടത്തി ഹൃദയത്തി​െൻറ പ്രവർത്തനം വീണ്ടെടുത്തതാണ് ജീവൻ രക്ഷിച്ചത്.

ഒരു രോഗിയെ ആശുപത്രിയിലെത്തിച്ചുകഴിഞ്ഞു തിരികെ പോകുകയായിരുന്നു ആംബുലൻസ്​ ജീവനക്കാർ. ആരോഗ്യനില മെച്ചപ്പെട്ടു എന്ന് ഉറപ്പാക്കിയ ശേഷം ​ ജീവനക്കാർ ഉടൻ തന്നെ അലിയാരെ കട്ടപ്പനയിലെ സ്വകാര്യ ആശുപത്രിയിലേക്ക് മാറ്റി. ശരീരത്തിൽ പൊള്ളൽ ഏറ്റിട്ടുണ്ടെങ്കിലും പരിക്ക്ഗുരുതരമല്ലെന്നും നിരീക്ഷണത്തിന് ശേഷം അലിയാർ ആശുപത്രി വിട്ടതായും ആശുപത്രി അധികൃതർ അറിയിച്ചു.