യാത്രാനിയ​​​ന്ത്രണങ്ങളി​െല ഇളവ്​: കോവിഡ്​ ബാധിതരുടെ എണ്ണത്തിൽ ഗണ്യമായ വർധന -മുഖ്യമന്ത്രി

തിരുവനന്തപുരം: യാത്രാനിയന്ത്രണങ്ങളില്‍ ഇളവുവന്നപ്പോള്‍ കേരളത്തില്‍ കോവിഡ് പോസിറ്റിവ് ആകുന്നവരുടെ എണ്ണത്തിൽ ഗണ്യമായി വർധനയുണ്ടായതായി മുഖ്യമന്ത്രി പിണറായി വിജയൻ. ​േമയ് എട്ടിന്​ ശേഷമുള്ള കണക്കുകള്‍ ഇതാണ് സൂചിപ്പിക്കുന്നത്. മേയ് എട്ടുവരെ  കോവിഡ് ബാധിച്ചവരുടെ ആകെ എണ്ണം 503 ആയിരുന്നു. ഇപ്പോൾ അത്​ 2697 ആണ്. 

യാത്രാനിയന്ത്രണങ്ങളില്‍ അയവുവന്നശേഷം  ജൂണ്‍ 16 വരെ വിദേശത്തുനിന്ന് 84,195 പേരും ഇതരസംസ്ഥാനങ്ങളില്‍നിന്ന് 1,79,059 പേരും  എത്തി. സമ്പര്‍ക്കത്തിലൂടെ രോഗം പകരുന്നത് പരമാവധി തടയാന്‍ സര്‍ക്കാര്‍ ജാഗ്രത പുലര്‍ത്തും. ഇക്കാര്യത്തില്‍ വേണ്ടത്ര മുന്‍കരുതലെടുത്തില്ലെങ്കില്‍ രോഗവ്യാപനതോത് നിയന്ത്രണാതീതമാകും.  

ഈ മുന്‍കരുതലി‍​െൻറ ഭാഗമായാണ് വിദേശത്തുനിന്ന് വരുന്നവര്‍ക്ക് അവര്‍ പുറപ്പെടുന്ന രാജ്യത്തുതന്നെ കോവിഡ് പരിശോധന നടത്തണമെന്ന് സര്‍ക്കാര്‍ ആവശ്യപ്പെട്ടത്. കോവിഡ് പരിശോധന​ നടത്തിയ ശേഷമാകണം പ്രവാസികള്‍ നാട്ടിലേക്ക് വരേണ്ടതെന്ന്​ ​േമയ് അഞ്ചിന് കേന്ദ്രത്തിന് നല്‍കിയ കത്തിലും സംസ്ഥാനം ആവര്‍ത്തിച്ചിരുന്നു. വന്ദേഭാരത് മിഷനിലൂടെ വരുന്നവര്‍ക്കും കോവിഡ് പരിശോധന നടത്തണമെന്നാണ് ആവശ്യപ്പെട്ടത്.  

ഇതിനകം ഇരുപതിലധികം വിമാനങ്ങള്‍ പരിശോധന നടത്തി നെഗറ്റിവ്​ ആയ യാത്രക്കാരുമായാണ് വന്നിട്ടുള്ളത്. ജൂണ്‍ 30നകം 100 വിമാനങ്ങള്‍ വരുന്നുണ്ടെന്നും ജൂണ്‍ 20ന്​  ശേഷം ഓരോ യാത്രക്കാര്‍ക്കും പ്രത്യേകമായി കോവിഡ് നെഗറ്റിവ് സര്‍ട്ടിഫിക്കറ്റ് ഉണ്ടാകുമെന്നും സ്​പൈസ്​ ജെറ്റ്​ സി.എം.ഡി അറിയിച്ചിട്ടുണ്ട്. യാത്രക്കാര്‍ക്ക് പി.സി.ആര്‍ ടെസ്​റ്റ്​ നടത്തുന്നതിന് പല രാജ്യങ്ങളിലും പ്രയാസം നേരിടുന്നുവെങ്കിൽ പെ​െട്ടന്ന്​ ഫലം കിട്ടുന്ന ആൻറിബോഡി ടെസ്​റ്റ്​ നടത്താം.  ട്രൂ നാറ്റ് എന്ന ചെലവുകുറഞ്ഞ പരിശോധനാസമ്പ്രദായം വ്യാപകമായിട്ടുണ്ട്. 

യാത്രക്കാര്‍ക്കും മറ്റും ഏറ്റവും ഉചിതമായ പരിശോധന​ എന്നാണ് ഇ​തിനെക്കുറിച്ച്​ പറയുന്നത്. നിലവിൽ വിദേശത്തുനിന്ന്​ വരുന്നവരില്‍ 1.5 ശതമാനം പേർ കോവിഡ് പോസിറ്റിവാകുന്നുണ്ട്​.  യാത്രക്കാരുടെ എണ്ണം രണ്ടു ലക്ഷത്തിലധികമായി വര്‍ധിക്കുമ്പോള്‍ പോസിറ്റിവ് കേസുകളുടെ എണ്ണവും വര്‍ധിക്കാന്‍ സാധ്യതയുണ്ട്. 

ഉദ്ദേശം രണ്ടു ശതമാനം ആളുകള്‍ കോവിഡ് പോസിറ്റിവായാല്‍ വിദേശത്തുനിന്ന്​ വരുന്നവരില്‍ നാലായിരത്തോളമാളുകള്‍ കോവിഡ് പോസിറ്റിവാവുന്ന സ്ഥിതി ഉണ്ടാവും. ഇവരില്‍ നിന്ന്​ സമ്പര്‍ക്കംമൂലം കൂടുതല്‍ ആളുകളിലേക്ക്​ രോഗം വ്യാപിക്കുകയും ചെയ്യും.  ഇത് സമൂഹവ്യാപനത്തിലേക്ക്​  നയിച്ചേക്കാമെന്നും മുഖ്യമന്ത്രി പറഞ്ഞു.