കൂലിത്തർക്കം; യാത്രക്കാരനെ വഴിയിലിറക്കിവിട്ട ഓട്ടോ ഡ്രൈവറുടെ ലൈസൻസ്​ റദ്ദാക്കി

കാക്കനാട് (കൊച്ചി): കൂലിത്തർക്കത്തിനിടെ യാത്രക്കാരനെ പാതിവഴിയിൽ ഇറക്കിവിട്ട് കടന്നുകളഞ്ഞ ഓട്ടോ ഡ്രൈവറുടെ ലൈസൻസ് സസ്പെൻഡ് ചെയ്തു. ഡിസംബർ അഞ്ചിനാണ്​ കേസിനാസ്പദമായ സംഭവം.

നെടുമ്പാശ്ശേരിയിൽ വിമാനമിറങ്ങി ആലുവ അത്താണിയിലേക്ക് ഓട്ടം വിളിച്ച കൊല്ലം ആർ.ടി ഓഫിസിലെ അസി.വെഹിക്കിൾ ഇൻസ്​പെക്ടറെയാണ്​ വഴിയിൽ ഇറക്കിവിട്ടത്​. മീറ്റർ പ്രവർത്തിപ്പിക്കണമെന്ന ആവശ്യം നിരസിക്കുകയും 100 രൂപയുടെ ഓട്ടത്തിന് 180 രൂപ ആവശ്യപ്പെടുകയും ചെയ്ത ഓട്ടോക്കാരനോട് മീറ്ററിട്ട് സവാരി തുടരാൻ പറഞ്ഞതാണ് തർക്കത്തിലേക്ക്​ നയിച്ചത്​.

ഇതേതുടർന്ന്​ എറണാകുളം ആർ.ടി ഓഫിസിൽ വാഹനത്തിന്‍റെ ഫോട്ടോ സഹിതം പരാതി കൊടുക്കുകയായിരുന്നു. ഹിയറിങ്ങിനിടെ കുറ്റം സമ്മതിച്ച ഓട്ടോ ഡ്രൈവർക്ക് 1700 രൂപ പിഴ ചുമത്തുകയും ലൈസൻസ് സസ്പെൻഡ് ചെയ്യുകയുമായിരുന്നു.