ശ്രീകലക്ക് മറ്റൊരു ബന്ധമുണ്ടെന്ന സംശയം കൊലക്കിടയാക്കിയെന്ന് എഫ്.ഐ.ആർ; മൂന്ന് പ്രതികൾ അറസ്റ്റിൽ

ആലപ്പുഴ: 15 വർഷം മുമ്പ്​ കാണാതായ ശ്രീക​ലയെ (കല) കൊന്ന കേസിൽ ഭർത്താവ്​ അനിലിന്‍റെ ബന്ധുക്കളായ മൂന്നുപേർ അറസ്റ്റിൽ. അനിലിന്‍റെ സഹോദരീഭർത്താവ്​ ചെന്നിത്തല തൃപ്പെരുന്തുറ ഇരമത്തൂർ കണ്ണമ്പള്ളിൽ കെ.ആർ. സോമരാജൻ (56), ബന്ധുക്കളായ ഇരമത്തൂർ കണ്ണമ്പള്ളിൽ കെ.സി. പ്രമോദ് (40), ഇരമത്തൂർ ജിനുഭവനം ജിനു ഗോപി (48) എന്നിവരെയാണ്​​ മാന്നാർ പൊലീസ്​ അറസ്റ്റ്​​ ചെയ്​തത്​. ചെങ്ങന്നൂർ ജുഡീഷ്യൽ ഒന്നാംക്ലാസ്​ മജിസ്​ട്രേറ്റ്​ ​കോടതിയിൽ ഹാജരാക്കിയ ഇവരെ ആറ്​ ദിവസത്തേക്ക്​ പൊലീസ്​ കസ്റ്റഡിയിൽ വിട്ടു. യുവതി​യെ കൊണ്ടുപോയ കാറും ആയുധവും കണ്ടെത്താൻ കൂടുതൽ തെളിവുകൾ ശേഖരിക്കാൻ​ വ്യാഴാഴ്ച പ്രതികളുമായി തെളിവെടുപ്പ്​ നടത്തും.

ശ്രീകലയെ അനിൽകുമാർ കൊലപ്പെടുത്തിയത്​ അവർക്ക് മറ്റൊരാളുമായി ബന്ധമുണ്ടെന്ന സംശയത്തിന്‍റെ പേരിലാണെന്നാണ്​​ പൊലീസിന്‍റെ നിഗമനം. പ്രതികളുടെ കുറ്റസമ്മതമൊഴിലൂടെയാണ്​​​ കൊലപാതകമെന്ന്​ സ്ഥിരീകരിച്ചത്​. അനിലാണ് ഒന്നാംപ്രതി. ബന്ധുക്കളും സുഹൃത്തുക്കളുമായ ജിനു, സോമരാജൻ, പ്രമോദ് എന്നിവരാണ് മറ്റ് പ്രതികൾ. ഇവർക്കെതിരെ കൊലക്കുറ്റം ചുമത്തിയിട്ടുണ്ട്​. 2009ലാണ്​ കേസിനാസ്​പദമായ സംഭവം. വിനോദയാത്രയാണെന്ന്​ പറഞ്ഞ്​ ശ്രീകലയെ അനിൽ എറണാകുളത്തേക്ക്​ വിളിച്ചുവരുത്തിയാണ്​ കൊലപാതകം ആസൂത്രണം ചെയ്തത്​. ബന്ധുക്കളായ പ്രതികളെയും കൂട്ടി മാന്നാറിന്​ സമീപത്തെ വലിയ ​പെരുമ്പുഴ പാലത്തിൽവെച്ച്​ കൊലപ്പെടുത്തിയശേഷം മൃതദേഹം മാരുതി കാറിൽ കൊണ്ടുപോയി മറവുചെയ്ത്​ തെളിവുകൾ നശിപ്പിച്ചു.

അതേസമയം, എങ്ങനെയാണ് കൊന്നതെന്നും എവിടെയാണ്​ കുഴിച്ചുമൂടിയതെന്നുമുള്ള കാര്യങ്ങൾ എഫ്​.ഐ.ആറിൽ പറയുന്നില്ല. ശ്രീകലയുടെ തിരോധാനവുമായി ബന്ധപ്പെട്ട് മറ്റൊരു എഫ്.ഐ.ആറും രജിസ്റ്റർ ചെയ്തിട്ടുണ്ട്​. ​ഭർതൃവീട്ടിലെ സെപ്​റ്റിക്​ ടാങ്കിൽനിന്ന്​ കിട്ടിയ മുടി, മുടിപ്പിൻ, ടാഗ്​, മാലയെന്ന്​ തോന്നിക്കുന്ന വസ്തു എന്നിവ ഫോറൻസിക്​ പരിശോധനക്ക്​ അയച്ചു. 15 വർഷം മുമ്പ്​ നടന്ന സംഭവത്തിന്‍റെ ചുരുളഴിയാൻ കൂടുതൽ അന്വേഷണം നടത്താനാണ്​ പ്രതികളെ പൊലീസ്​ കസ്​റ്റഡിയിൽ വിട്ടത്​. കടത്തിക്കൊണ്ടുപോയ വാഹനവും കണ്ടെത്തണം. സംഭവത്തിൽ കൂടുതൽ പ്രതികൾ ഉൾപ്പെട്ടിട്ടുണ്ടോയെന്ന സംശയവുമുണ്ട്​. ഇസ്രായേലിൽ കഴിയുന്ന അനിലിനെ രണ്ടുദിവസത്തിനകം നാട്ടി​​​ലെത്തിക്കുമെന്നും സൂചനയുണ്ട്​.

ജില്ല ​പൊലീസ്​ മേധാവി ചൈത്ര തെരേസ ​ജോൺ അടക്കമുള്ള ഉന്നത പൊലീസ്​ ഉദ്യോഗസ്ഥരുടെ നേതൃത്വത്തിൽ പ്രതികളെ വിശദമായി വീണ്ടും ചോദ്യം ചെയ്​തശേഷമാണ്​ കോടതിയിൽ ഹാജരാക്കിയത്​. വൻ പൊലീസ്​ സുരക്ഷയിൽ ഉച്ചക്ക്​ 2.15ന്​​ വൈദ്യപരിശോധനക്ക്​ ചെങ്ങന്നൂർ ജില്ല ആശുപത്രിയിൽ പ്രതികളെ എത്തിച്ചപ്പോൾ സ്ത്രീകളും രോഗികളും കൂട്ടിരിപ്പുകാരും അസഭ്യവർഷത്തോടെയാണ്​ എതിരേറ്റത്​. ശ്രീകലയുടെ ബന്ധുവായ സ്ത്രീയും​ ​പൊട്ടിത്തെറിച്ചു.