പ്രതികളുമായി പോയ പൊലീസ് വാനും കാറും കൂട്ടിയിടിച്ച് 10 പേർക്ക് പരിക്ക്

കോഴിക്കോട്: കൊയിലാണ്ടിയില്‍ പ്രതികളുമായി പോയ പൊലീസ് വാനും കാറും കൂട്ടിയിടിച്ച് മൂന്ന് പൊലീസുകാരുള്‍പ്പെടെ 10 പേര്‍ക്ക് പരിക്കേറ്റു. പരിക്കേറ്റ ഏഴുപേരെ കൊയിലാണ്ടി താലൂക്ക് ആശുപത്രിയില്‍ പ്രവേശിപ്പിച്ചു. ഒരാളെ കോഴിക്കോട് മെഡിക്കല്‍ കോളജ് ആശുപത്രിയിലേക്ക് മാറ്റി.

മലപ്പുറം എ.ആര്‍ ക്യാമ്പിലെ ബസാണ് അപകടത്തില്‍ പെട്ടത്. പ്രതികളുമായി കണ്ണൂര്‍ സെന്‍ട്രല്‍ ജയിലില്‍ പോയി മടങ്ങുന്നതിനിടെ വൈകീട്ട് 3.30ഓടെയാണ് സംഭവം. ദേശീയപാതയില്‍ കൊയിലാണ്ടി കൃഷ്ണ തിയേറ്ററിന് സമീപത്തുവെച്ച് ഇന്നോവ കാറുമായി കൂട്ടിയിടിക്കുകയായിരുന്നു.

അപകടത്തിൽ കാറിന്‍റെ മുന്‍ഭാഗം പൂര്‍ണ്ണമായും തകര്‍ന്നു. ഉള്ളിൽ കുടുങ്ങിയ ഡ്രൈവറെ അഗ്‌നിരക്ഷാസേനയും നാട്ടുകാരും ചേര്‍ന്ന് കട്ടര്‍ ഉപയോഗിച്ച് ഡോർ മുറിച്ചാണ് പുറത്തെടുത്തത്.