കുട്ടനാട്ടിൽ തോമസ് കെ. തോമസ് എൽ.ഡി.എഫ് സ്ഥാനാർഥി

ആലപ്പുഴ: കുട്ടനാട് ഉപതെരഞ്ഞെടുപ്പിൽ എൽ.ഡി.എഫ് സ്ഥാനാർഥിയായി എൻ.സി.പിയിലെ തോമസ് കെ. തോമസ് മൽസരിക്കും. മുൻ എം.എൽ.എ തോമസ്​ ചാണ്ടിയുടെ സഹോദരനാണ്.

സ്ഥാനാർഥി സംബന്ധിച്ച് എൻ.സി.പി നേരത്തെ തീരുമാനം എടുത്തതാണെന്ന് മന്ത്രി എ.കെ ശശീന്ദ്രൻ മാധ്യമങ്ങളോട് പറഞ്ഞു.

തോമസ്​ ചാണ്ടി എം.എൽ.എയുടെ മരണത്തെ തുടർന്നുണ്ടായ ഒഴിവിലാണ്​ കുട്ടനാട്​ ഉപതെരഞ്ഞെടുപ്പിന്​ കളമൊരുങ്ങിയത്​. 2019 ഡിസംബർ 20നാണ്​ തോമസ്​ ചാണ്ടി മരിച്ചത്​. വൈകാതെ ലോകത്താകമാനം കോവിഡ്​ മഹാമാരി പടർന്നു പിടിച്ചതിനാൽ ഉപതെരഞ്ഞെടുപ്പിന്​ സാധ്യതയില്ലെന്ന തരത്തിലുള്ള വാർത്തകൾ പ്രചരിച്ചിരുന്നു.

ഇതിനിടെയാണ് കുട്ടനാട്​ ഉപതെരഞ്ഞെടുപ്പ്​ നവംബറിൽ ഉണ്ടാകുമെന്നും തീയതി പിന്നാലെ അറിയിക്കുമെന്നും കേന്ദ്ര തെരഞ്ഞെടുപ്പ്​ കമീഷ​ൻ അറിയിച്ചത്.

തോമസ് ചാണ്ടി 2016 ൽ മത്സരിച്ചപ്പോൾ ഡമ്മി സ്ഥാനാർഥിയായി പത്രിക നൽകിയതും തോമസ് കെ. തോമസ് ആയിരുന്നു. തോമസ്​ ചാണ്ടി അസുഖ ബാധിതനായപ്പോൾ മണ്ഡലത്തി​​ന്‍റെ ചുമതല ഏൽപ്പിച്ചിരുന്നതും തോമസിനെയായിരുന്നു. തോമസ് പിൻഗാമിയാകണമെന്ന് തോമസ് ചാണ്ടി ആഗ്രഹിച്ചിരുന്നുവെന്ന് ചൂണ്ടിക്കാട്ടി ഭാര്യ മേരി ചാണ്ടി മുഖ്യമന്ത്രി, എന്‍.സി.പി നേതാക്കള്‍, സി.പി.എം സംസ്ഥാന സെക്രട്ടറി എന്നിവർക്ക് നേരത്തെ കത്തയച്ചിരുന്നു.