പ്രളയക്കെടുതി: മാറ്റിവെച്ച പരീക്ഷകളും അഭിമുഖങ്ങളും ഉടനെന്ന് പി.എസ്.സി

തിരുവനന്തപുരം: പ്രളയക്കെടുതിയുടെ പശ്ചാത്തലത്തിൽ മാറ്റിവെച്ച ഓൺലൈൻ, ഒ.എം.ആർ പരീക്ഷകൾ സെപ്​റ്റംബർ പകുതിയോടെ പൂർത്തിയാക്കാനുള്ള തയാറെടുപ്പിൽ പി.എസ്.സി. ആസ്ഥാന/മേഖല/ജില്ല ഓഫിസുകളിൽ നടത്താനിരുന്ന എല്ലാ വെരിഫിക്കേഷനുകളും അഭിമുഖങ്ങളും മാറ്റിവെച്ച ഡിപ്പാർട്ട്മ​​െൻറ് പരീക്ഷകളും സെപ്റ്റംബർ 21നുള്ളിൽ പൂർത്തീകരിക്കാനാണ് പി.എസ്.സി പദ്ധതിയിട്ടിരിക്കുന്നത്. ഇതുസംബന്ധിച്ച റീഷെഡ്യൂൾ അന്തിമഘട്ടത്തിലാണെന്നും വരുംദിവസങ്ങളിൽ തന്നെ പരീക്ഷ സംബന്ധിച്ച വിവരങ്ങൾ ഒറ്റത്തവണ രജിസ്ട്രേഷൻ പ്രൊഫൈലിലൂടെയും എസ്.എം.എസ് മുഖേനയും പത്ര-ദൃശ്യമാധ്യമങ്ങൾ വഴിയും അറിയിക്കുമെന്നും അധികൃതർ വ്യക്​തമാക്കി.


അതിതീവ്രമായ മഴയെ തുടർന്ന് പ്രമുഖ പരീക്ഷകളൊന്നും തന്നെ പി.എസ്.സി മാറ്റിയിരുന്നില്ല. 18ന് നടത്താനിരുന്ന ഇൻസ്ട്രകർ ഇൻ വിവീങ്, ടൈപ്പിസ്​റ്റ്​ തസ്തികയിലേക്കുള്ള ഡിറ്റേഷൻ ടെസ്​റ്റുകളാണ് മാറ്റിവെച്ചിട്ടുള്ളതിൽ ചിലത്. ഇതിന് പുറമെ നിരവധി അഭിമുഖങ്ങളും വകുപ്പ് തല പരീക്ഷകളും മാറ്റിവെച്ചിട്ടുണ്ട്. വകുപ്പ് തല പരീക്ഷകൾ സെപ്റ്റംബർ  16,18, 21 തീയതികളിലായി നടത്താണ് തത്വത്തിൽ ധാരണയായിരിക്കുന്നത്.