ജിമ്മിൽ മോഷണം; ബിഗ് ബോസ് താരം ജിന്‍റോക്കെതിരെ കേസ്

കൊച്ചി: ജിമ്മിൽനിന്ന്​ പണവും വിലപ്പെട്ട രേഖകളും മോഷ്ടിച്ചെന്ന പരാതിയിൽ ബിഗ് ബോസ് താരം ജിന്‍റോക്കെതിരെ പാലാരിവട്ടം പൊലീസ് കേസെടുത്തു. വ്യാജ താക്കോൽ ഉപയോഗിച്ച് അകത്തുകടന്ന് ജിമ്മിലെ സി.സി.ടി.വി കാമറകൾ തകർക്കാൻ ശ്രമിക്കുകയും 10,000 രൂപയും രേഖകളും മോഷ്ടിക്കുകയും ചെയ്​തെന്നാണ് ജിന്‍റോ ഉടമയായ ജിം ഏറ്റെടുത്ത് നടത്തുന്ന യുവതി പരാതിയിൽ ആരോപിക്കുന്നത്. സി.സി.ടി.വി ദൃശ്യങ്ങളും പരാതിക്കൊപ്പം നൽകി. തിങ്കളാഴ്ച പുലർച്ച രണ്ടോടെ വെണ്ണലയിലെ ജിമ്മിലാണ്​ സംഭവം.

ഇതിനുമുമ്പും യുവതിയുടെ പരാതിയിൽ ജിന്‍റോക്കെതിരെ പീഡനത്തിന്​ ഉൾപ്പെടെ പൊലീസ് കേസെടുത്തിട്ടുണ്ട്. ബിഗ് ബോസ് സീസൺ ആറിലെ വിജയിയാണ്​ ജിന്‍റോ.