ഒറ്റപ്പെട്ട ശക്തമായ മഴ: നാളെ നാല്​ ജില്ലകളിൽ മഞ്ഞ അലർട്ട്​

തിരുവനന്തപുരം: ഒറ്റപ്പെട്ട ശക്തമായ മഴക്ക്​ സാധ്യതയുള്ളതിനാൽ നാളെ നാല്​ ജില്ലകളിൽ മഞ്ഞ അലർട്ട്​ പ്രഖ്യാപിച്ചു. ഇടുക്കി, പാലക്കാട്, മലപ്പുറം, വയനാട് ജില്ലകളിലാണ് കേന്ദ്ര കാലാവസ്ഥ വകുപ്പ് ശനിയാഴ്ച മഞ്ഞ അലർട്ട്​ പ്രഖ്യാപിച്ചത്.

തെക്കൻ തമിഴ്നാടിന് മുകളിലും തെക്കൻ അന്തമാൻ കടലിന് മുകളിലും ചക്രവാതച്ചുഴി നിലനിൽക്കുന്നുണ്ട്​. ഇതോടൊപ്പം അറബിക്കടലിൽനിന്നും ബംഗാൾ ഉൾക്കടലിൽനിന്നും വരുന്ന കാറ്റിന്‍റെ സംയോജന ഫലമായി ഞായറാഴ്ച വരെ സംസ്ഥാനത്തിന്‍റെ വിവിധ ഭാഗങ്ങളിൽ ശക്തമായ ഇടിമിന്നലോടുകൂടിയ മഴ തുടരും.