എച്ച്.ഡി. രേവണ്ണയുടെ ജാമ്യം 20 വരെ നീട്ടി

ബം​ഗളൂരു: ലൈംഗിക പീഡനക്കേസിൽ ജെ.ഡി.എസ് എം.എൽ.എയും കർണാടക മുൻ മന്ത്രിയുമായ എച്ച്.ഡി. രേവണ്ണക്ക് അനുവദിച്ച ഇടക്കാല മുൻകൂർ ജാമ്യം മേയ് 20 വരെ നീട്ടി. നേരത്തേ വെള്ളിയാഴ്ച വരെയായിരുന്നു ജാമ്യം അനുവദിച്ചിരുന്നത്.

47കാരിയായ വീട്ടുജോലിക്കാരിയെ ലൈം​ഗികമായി പീഡിപ്പിച്ച പരാതിയിലാണ് ഹൊളനരസിപുര എം.എൽ.എയും മുൻ പ്രധാനമന്ത്രി എച്ച്.ഡി. ദേവ​ഗൗഡയുടെ മകനുമായ എച്ച്.ഡി. രേവണ്ണക്കും, മകനും ഹാസൻ എം.പിയുമായ പ്രജ്വൽ രേവണ്ണക്കുമെതിരെ ഹൊളനരസിപുര പൊലീസ് കേസെടുത്തത്.

കേസ് വിവാദമായതിനെത്തുടർന്ന് തെരഞ്ഞെടുപ്പി​ന്റെ പിറ്റേന്ന് രാജ്യംവിട്ട പ്രജ്വൽ ഇപ്പോഴും വിദേശത്ത് തുടരുകയാണ്. എം.എൽ.എയുടെ വസതിയിൽ ​െവച്ച് അച്ഛനും മകനും ലൈംഗികമായി പീഡിപ്പിച്ചുവെന്നാണ് പരാതിയിലുള്ളത്. ജനപ്രതിനിധികൾക്കുള്ള പ്രത്യേക കോടതിയാണ് രേവണ്ണക്ക് ജാമ്യമനുവദിച്ചത്. രേവണ്ണയെ എസ്.ഐ.ടിയുടെ അല്ലെങ്കിൽ ജുഡീഷ്യൽ കസ്റ്റഡിയിൽ വിടണമെന്നാണ് പ്രത്യേക അന്വേഷണ സംഘം (എസ്.ഐ.ടി) കോടതിയിൽ വാദിച്ചത്. ഇരു വിഭാ​ഗങ്ങളുടെയും വാദം കേട്ട ശേഷമാണ് വെള്ളിയാഴ്ച വരെ കോടതി ജാമ്യമനുവദിച്ചത്.

വെള്ളിയാഴ്ച വീണ്ടും വാദം കേട്ട കോടതി വിധി പറയുന്നത് തിങ്കളാഴ്ചയിലേക്ക് മാറ്റിവെക്കുകയും അതുവരെ രേവണ്ണക്ക് ജാമ്യം നീട്ടിനൽകുകയും ചെയ്തു.