രണ്ട്​ ഐപാഡ്​ മോഡലുകൾ പുറത്തിറക്കി ആപ്പിൾ

രണ്ട്​ ഐപാഡ്​ മോഡലുകൾ കൂടി പുറത്തിറക്കി ആപ്പിൾ. 10.2 ഇഞ്ച്​ ഡിസ്​പ്ലേ വലിപ്പത്തിൽ വില കുറഞ്ഞ മോഡലായ ഐപാഡ്​ എട്ടാം തലമുറയും. ഐപാഡ്​ എയറുമാണ്​ കമ്പനി പുറതതിറക്കിയത്​. കൂടുതൽ കരുത്തോടെയാണ്​ ​ഐപാഡ്​ എയറിൻെറ വരവ്​.

ഐപാഡ്​ എട്ടാം തലമുറ

ഐപാഡ്​ സ്വപ്​നം കാണുന്ന തുടക്കക്കാരെ ലക്ഷ്യമിട്ടാണ്​ ഐപാഡ്​ എട്ടാം തലമുറ എത്തുന്നത്​. 10.2 ഇഞ്ച്​ ഡിസ്​പ്ലേ വലിപ്പത്തിൽ A12 ചിപ്​സെറ്റിൻെറ കരുത്തിലാണ്​ ടാബ്​ലെറ്റ്​ എത്തുന്നത്​. എൻട്രി ലെവൽ ഐപാഡാണെങ്കിൽ ഗ്രാഫിക്​സിലുൾപ്പടെ മികച്ച പ്രകടനം ലഭിക്കുമെന്നാണ്​ ആപ്പിൾ അവകാശപ്പെടുന്നത്​. ഒന്നാം തലമുറ ആപ്പിൾ പെൻസലിനെ ടാബ്​ലെറ്റ്​ പിന്തുണക്കും.

ഐപാഡിൻെറ ഏറ്റവും പുതിയ ഓപ്പറേറ്റിങ്​ സിസ്​റ്റമായ ഒ.എസ്​ 14ലാണ്​ പ്രവർത്തനം. ഹാൻഡ്​റിട്ടൺ ടെക്​സ്​റ്റ്​ ഇൻപുട്ട്​​ പോലുള്ള നൂതന ഫീച്ചറുകൾ ടാബിൻെറ ഭാഗമാണ്​. വില കുറഞ്ഞ ഐപാഡായതിനാൽ ടൈപ്പ്​ സി പോർട്ട്​ ആപ്പിൾ ഉൾപ്പെടുത്തിയിട്ടില്ല. ടച്ച്​ ഐ.ഡി ഹോം ബട്ടൻ തന്നെയാണ്​ ഉൾക്കൊള്ളിച്ചിരിക്കുന്നത്​.

ഐപാഡ്​ എയർ

ഐപാഡ്​ പ്രോയോട്​ സമാനമായ ഫീച്ചറുകൾ തന്നെയാണ്​ ​ഐപാഡ്​ എയറിലുമുള്ളത്​. ഐപാഡ്​ പ്രോയുടെ അപ്​ഡേറ്റ്​ ചെയ്​ത ഡിസൈനാണ്​ ഐപാഡ്​ എയറിനുള്ളത്​. എന്നാൽ ടച്ച്​ ഐ.ഡി സെൻസർ ഹോം ബട്ടനിൽ നിന്ന്​ പവർ ബട്ടനിലേക്ക്​ മാറ്റിയെന്നതാണ്​ പ്രധാന സവിശേഷത.

10.9 ഇഞ്ച്​ ലിക്വുഡ്​ റെറ്റിന ഡിസ്​പ്ലേയാണ്​ ഐപാഡ്​ എയറിനുള്ളത്​. 2360x1640 ആണ്​ പിക്​സൽ റെസലൂഷൻ. ആപ്പിളിൻെറ ബയോനിക്​ എ 14 ചിപ്പാണ്​ കരുത്ത്​ പകരുന്നത്​. ഐപാഡ്​ പ്രോയേക്കാളും 40 ശതമാനം വേഗത കൂടുതലായിരിക്കും ഐപാഡ്​ എയറിന്​.

ഐപാഡ്​ എയറിൽ യു.എസ്​.ബി ടൈപ്പ്​ സി ഉൾപ്പെടുത്തിയിട്ടുണ്ട്​. 20W ചാർജിങ്ങും 5 ജി.ബി.പി.എസ്​ ഡാറ്റ ട്രാൻസ്​ഫറും ഐപാഡിൽ നിന്ന്​ ലഭ്യമാകും​. വൈ-ഫൈ 6നേയും പിന്തുണക്കും.

12 മെഗാപിക്​സലിൻെറ പിൻകാമറയും 7 മെഗാപിക്​സലിൻെറ ഫേസ്​ എച്ച്​.ഡി മുൻ കാമറയുമാണ്​ നൽകിയിരിക്കുന്നത്​. ഐപാഡ്​ എയർ വൈ-ഫൈ മോഡലിന്​ 54,900 രൂപയും വൈ-ഫൈ സെല്ലുലാർ മോഡലിന്​ 66,900 രൂപയുമാണ്​ വില. ഐപാഡ്​ എട്ടാം തലമുറ വൈ-ഫൈ മോഡലിന്​ 29,900 രൂപയും വൈ-ഫൈ സെല്ലുലാറിന്​ 41,900 രൂപയുമാണ്​ വില.