ടെക്​ വിസ്മയമൊരുക്കി ജൈടെക്സ്​ ഇന്നു​ മുതൽ

ദുബൈ: സാ​ങ്കേതികവിദ്യയിലെ വിസ്മയലോകത്തേക്ക്​ സ്വാഗതം, ലോകത്തിലെ ഏറ്റവും വലിയ ടെക്​ ഷോയായ ഗൾഫ്​ ഇൻഫർമേഷൻ ടെക്​നോളജി എക്​സിബിഷൻ ​ (ജൈടെക്സ്​) തിങ്കളാഴ്ച ദുബൈ വേൾഡ്​ ട്രേഡ്​ സെന്‍ററിൽ തുടങ്ങും. കേരളത്തി​ൽനിന്നും ഇന്ത്യയിലെ വിവിധ സംസ്ഥാനങ്ങളിൽനിന്നുമുള്ള 200ഓളം കമ്പനികൾ ഉൾപ്പെടെ 5000ത്തോളം സ്ഥാപനങ്ങൾ പ​ങ്കെടുക്കും.

20 ലക്ഷം ചതുരശ്ര മീറ്ററിൽ 26 ഹാളിലായാണ്​ പരിപാടി. കഴിഞ്ഞ വർഷത്തേക്കാൾ 25 ശതമാനം ഏരിയ ഇക്കുറി കൂടുതലുണ്ട്​. ദുബൈയിലെ വിവിധ സർക്കാർ വകുപ്പുകൾ, ലോകത്തിന്‍റെ വിവിധ ഭാഗങ്ങളിലെ സാ​ങ്കേതിക വിദഗ്ധർ, കമ്പനികൾ, സർക്കാർ സ്ഥാപനങ്ങൾ എന്നിവയെല്ലാം അണിനിരക്കും. 170 രാജ്യങ്ങളിലെ സന്ദർശകരെ പ്രതീക്ഷിക്കുന്ന ജൈടെക്​സിൽ 90ലധികം രാജ്യങ്ങളുടെ പവിലിയനുണ്ടാകും. 'എന്‍റർ ദി നെക്സ്റ്റ്​ ഡിജിറ്റൽ യൂനിവേഴ്​സ്​' എന്ന പ്രമേയത്തിലാണ്​ 42ാം എഡിഷൻ അരങ്ങേറുന്നത്​.

ഏറ്റവും പുതിയ സാ​​ങ്കേതിക സംവിധാനമായ മെറ്റാവേഴ്​സിന്‍റെ പുതിയ രൂപഭാവങ്ങൾ ഇവിടെ കാണാം. േബ്ലാക്ക്​ ചെയിൻ, ആർട്ടിഫിഷ്യൽ ഇന്‍റലിജൻ​സ്​, ഓഗ്​മന്‍റ്​ റിയാലിറ്റി, റി​മോട്ട്​ വർക്ക്​ ആപ്​, ഡിജിറ്റൽ ഇക്കോണമി, ക്രിപ്​റ്റൊകറൻസി, കോഡിങ്​ തുടങ്ങിയവയുമായി ബന്ധപ്പെട്ട പുതിയ കണ്ടുപിടിത്തങ്ങൾ ഇവിടെയുണ്ടാകും. ഭാവി വാഹനമായി കരുതപ്പെടുന്ന ഡ്രൈവറില്ലാ കാർ, പറക്കും കാർ, ഇലക്​ട്രിക്​ വാഹനങ്ങൾ എന്നിവയെല്ലാം പ്രദർശനത്തിനുണ്ടാകും. gitex.com എന്ന വെബ്​സൈറ്റ്​ വഴി ടിക്കറ്റെടുത്ത്​ പ്രവേശിക്കാം. 220 മുതലാണ്​ ടിക്കറ്റ്​ നിരക്ക്​.

കേരളത്തിൽനിന്ന്​ 40 സ്റ്റാർട്ടപ്​

ദുബൈ: കേരളത്തിന്‍റെ സാ​ങ്കേതിക പരിജ്ഞാനം ലോകത്തിന്​ പകർന്നുനൽകാൻ ലക്ഷ്യമിട്ട്​ കേരളത്തിൽ നിന്ന്​ 40 സ്റ്റാർട്ടപ്പുകൾ ജൈടെക്സിന്‍റെ ഭാഗമാകും. കേരള സ്​റ്റാർട്ടപ്​ മിഷന്‍റെ നേതൃത്വത്തിലാണ്​ സംഘം എത്തുന്നത്​. സൈബർ സുരക്ഷ, മീഡിയ ടെക്​, എജുടെക്​, സംരംഭകത്വം, ഹെൽത്ത്​, ഫിൻടെക്​, കൺസ്യൂമർ ടെക്​, ഇൻഷുറൻസ്​, ഇന്‍റർനെറ്റ്​ ഓഫ്​ തിങ്​സ്​ തുടങ്ങിയ മേഖലകളിലെ സ്റ്റാർട്ടപ്പുകളാണ്​ കേരളത്തിൽനിന്ന്​ പ​ങ്കെടുക്കുക. മുൻ വർഷങ്ങളിലും സ്റ്റാർട്ടപ്​ മിഷൻ സാന്നിധ്യം അറിയിച്ചിട്ടുണ്ടെങ്കിലും ആദ്യമായാണ്​ ഇത്രയധികം കമ്പനികൾ എത്തുന്നത്​. ഗൾഫ്​ രാജ്യങ്ങൾ ഉൾപ്പെടെ മറ്റു​ വിദേശ രാജ്യങ്ങളുമായി കരാറിൽ ഒപ്പുവെക്കാൻ കഴിയുമെന്നാണ്​ പ്രതീക്ഷ.