സർക്കാറിനെ വിമർശിച്ചു; വിയറ്റ്​നാമിൽ മൂന്ന്​ മാധ്യമ പ്രവർത്തകർക്ക്​ ജയിൽശിക്ഷ

ഹോചിമിൻ സിറ്റി: ഭരണകൂടത്തിനെതിരായ വാർത്തകൾ പ്രചരിപ്പിച്ചുവെന്ന കുറ്റത്തിന്​ വിയറ്റ്​നാം കോടതി മൂന്ന്​ മാധ്യമ പ്രവർത്തകർക്ക്​ തടവുശിക്ഷ വിധിച്ചു. 11 മുതൽ 15 വർഷം വരെയാണ്​ ശിക്ഷ കാലാവധി. മൂന്നുപേരും 'വിയറ്റ്​നാം സ്വതന്ത്ര മാധ്യമ പ്രവർത്തക അസോസിയേഷൻ' (ഐ.ജെ.എ.വി.എൻ) നേതാക്കളാണ്​.

ഹോചിമിൻ സിറ്റി പീപ്​ൾസ്​ കോടതിയുടേതാണ്​ വിധി. സർക്കാറിനെതിരെ വ്യാജവിവരങ്ങളും വളച്ചൊടിച്ച വാർത്തകളും പ്രചരിപ്പിച്ചുവെന്ന്​ കുറ്റപത്രത്തിൽ ആരോപിച്ചിരുന്നു. തങ്ങളുടെ വാദം കോടതി പരിഗണിച്ചില്ലെന്ന്​ ശിക്ഷക്ക്​ വിധേയരായവരിൽ ഒരാളായ ദാങ്​ ദിൻ മാൻ പറഞ്ഞു.

ഭരണകക്ഷിയായ കമ്യൂണിസ്​റ്റ്​ പാർട്ടിയുടെ ദേശീയ കോൺഗ്രസ്​ ഈ മാസം നടക്കാനിരിക്കുകയാണ്​. രാഷ്​ട്രീയ വിമതർക്കും ആക്​ടിവിസ്​റ്റുകൾക്കുമെതിരെ സർക്കാർ നടപടി തുടർക്കഥയാകു​ന്നതിനിടെയാണ്​ കോൺഗ്രസ്​ ചേരുന്നത്​.